Qallunaat oqaasii atuarfinni oqaatsitut siullertut atorunnaariartorput
Kalaallit nunaanni qallunaat oqaasii allamiut oqaasiitut siullertut atorunnaariartorput. Tuluit oqaasii salliutikkiartorneqarput. Tuluit oqaasiisa atuarfinni atualeqqaat atuartinneqarneranni atuartitsissutigineqartalernissaa ingerlaannaq aallartinnavianngilaq.
Siornatigut ilinniartitaanermut Naalakersuisuusimasup, Doris Jakobsen-ip, Siumut-meersup siunnersuutigisimavaa; allamiut oqaasii nunatsinni atuarfinni ilinniartitsissutigineqartarnissaat nalilersoqinneqartariaqartoq. Siunnersuutigisimasaalu taassaavoq tuluit oqaasii nunarsuarmi tamarmi atungaasut 1. klasse-miit ilinniartitsissutigineqartalissasut soorlutaaq kalaallit qallunaallu oqaasii aamma 1. klassemi ilinniartitsissugineqartartut.
Ullumikkut tuluit oqaasii 2004-miit 4. klasse-miit ilinniartitsissutigineqartarlerput.
Siornatigut 7 klasse-miit aatsaat tuluit oqaasii ilinniartitsissutigineqartarsimagaluarput.
Doris Jakobsen-ip siunnersuutaa siullermeerlugu suliarineqarnerani naalakkersuisuniit illua´tungiliuttuniillu itigartitsissutigineqassagaluarpat, eqqarsaat taanna allanngungaarnavianngilaq.
Ruth Heilmann-ip Siumut-meersup, naalakkersuisut kaammattorpai 1. klasse-mi tuluit oqaasiisa ilinniartitsissutigineqartalernissaannut periarfissanik sukumiisumik misissueqqissaaqqullugit, isumaqarami kinguaariinnut tullernut tamanna pingaaruteqarluinnartussaasoq, tuluit oqaasii siullertut aappaatullu qallunaat oqaasii allamiut oqaasisut ilinniartitsissutigineqartalissappata.
Kiisalu aamma Atassummeersup, Kristian Jeremiassen-ip naatsorsuutigaa, tuluit oqaasii siunissami allamiut oqaasiinik ilinniagassatut sallerpaanngorumaatut.
Isumaqarnerarlunili qallunaat oqaasiisa ullumikkut allamiut oqaasiisut siullertut ilinniartitsissutigineqartarnerat ippinnartoqartinnagu.
IA-p tuluit oqaasiisa 1. klasse-miit ilinniartitsissutigineqartalernissaat nangaanartoqartippaa. Olga P. Berthelsen-ip oqaaseqarnermini oqaatigaa, 4. klasse-miit tuluit oqaasinik ilinniartitsisarneq naliliivigineqaqqaartariaqassasoq, oqarlunili
atuartut 1. klasse-miit oqaatsinik sammisaqartarneq aallartereertarsinnaangaat, soorlu oqaatsinik ineriartortitsinikkut pitsaasunik sammisassaqartitsilluni, erinarsortitsinikkut, pinnguarnikkut pinnguaatinillu atuinertigut ilinniartitsissoqarsinnaalluni.
Demokraatit tunngaviusumik siusippaallaaraat, Jens B. Frederiksen-ili isumaqarpoq, siunnersuut akissutissarsinerminngarniit apeqquterpassuarnik pilersitsiinnartoq soorlu assersuutigalugu; ilinniartitsissut suminngaaniit pissarsiarineqarnissaat eqqarsaatigalugu, ullumikkummigooq tuluit oqaasiinut tunngatillugu ilinniartitsisussaaleqinerit annertoreeqimmata.
Kattusseqatigiit meeqqat sinnerlugit eqqarsarnartoqartitsisorujussuupput. Meeqqammi 1. klasse-miit kalaallisut, qallunaatut tuluttullu ilinniartalissagaluarunik taakkununnga artornartorujussuanngussammat, taamatut oqarpoq; Loritha Henriksen. Doris Jakobsen-ip siunnersuutaa inatsisartuni suliarineqartinnagu, atuartitaanermut ataatsimiititaliami oqallisigineqartussaavoq.
