Qallunaat nunatsinnut takornariartartut unnuisartullu ikiliartorput

Qallunaat akunnittarfinni vandrehjeminilu ukioq manna qaammatini siullerni arfinilinni katillugit 22.394-eriarlutik unnuisarsimapput, siorna 30.000-it missaanniittut.

Appariaat taamaasilluni 25,5 procentit missaanniippoq.

Akunnittarfinni vandrehjeminilu unnuisartut nunatsinneersut, takornariallu nunanit allaneersut, Danmarki ilanngunnagu, amerlerialaarsimasut, kisitsisit takutippaattaaq.

Inuit katillugit 58.000-eriarlutik akunnittarfinni vandrehjeminilu januaarimiit juuli tikillugu unnuisarsimapput.

Akunnittarfinni vandrehjeminilu ukioq manna qaammatit siulliit arfinillit ingerlaneranni unnuisimasut ataatsimut isigalugit, tassa nunatsinneersut, Danmarkimeersut nunanillu allaneersut, amerleriarput, inullu ataaseq agguaqatigiissillugu ulluni pingasuni akunnittarfimmi vandrehjemimiluunniit unnuisimavoq.

Nunap immikkoortuinut agguataaraanni takuneqarsinnaavoq Kommune Kujallermi, Qeqqatalu Kommuniani akunnittarfinni vandrehjeminilu unnuisimasut siornamut naleqqiullugu ikilisimasut, Kommuneqarfik Sermersuumilu allannguuteqarpallaarsimanngitsut.

Qaasuitsup Kommuniani akunnittarfinni unnuisarsimasut amerleriarsimapput.