Qallunaat nittartakkatigut niuernermi isertitassaraluatik annaasarpaat

H&M, Gyldendal, Matas, cdon.dk. Suliffeqarfiit Kalaallinut Nunaannut nassitserusunngitsut amerlapput. Maannali nittartakkatigut niuerneq annertusiteriarniarlugu PostDanmark suliniuteqalerpoq. Tassamigooq ilisimasakinneq pissutaasarpoq qallunaat Kalaallit Nunaannut nassitserusuttannginnerannut, PostDanmarkimi nunatsinnut Savalimmiunullu nittartakkatigut niuernermi akisussaasoq Wilfred Yeung oqarpoq.

Nunatsinniit nittartakkatigut niuertartut ujartorajuaat atisat aamma elektronikimut atortorissaarutit. Akuttunngitsumilli oqaatigiit "Savalimmiunut Kalaallit Nunaannullu nassiussineq ajorpugut" naammattoortarpaat. Taamaasiornikkulli qallunaat suliffeqarfii imminnut sianiinnaaginnartartut PostDanmark isumaqarpoq.

- Kalaallit niuernissaq annertunerujartortumik pisariaqartippaat. Piserusussuseq pisisinnaassuserlu pigereerpaat. Soorunami inuttussutsikkut inuit million-ip affaanik amerlassuseqanngikkaluarput, pisisinnaasulli ima amerlatigaat qallunaat suliffeqarfiutaasa ukiumut isertitaannut amerlissutaasinnaallutik, Wilfred Yeung KNR-imut oqarpoq.

Aporfiilli aamma ilagisarpaat suliffeqarfiit Kalaallit Nunaannut Savalimmiunullu nassiussisaraluarlutik sullissinut 2-300 koruuninik akitsuusiisarmata.

- Tamanna arlaatigut ajortoqarpoq. Qallunaat suliffeqarfiutaasa Kalaallit Nunaannut nassiussinissaat Sverigemut nassiussinermiit pisariunnginneruvoq. Assigiinnarpaa pisianiartoq oqarfigigaanni: "Illit niueqatigerusunngilatsigit", Wilfred Yeung oqarpoq.

Atuisunut KNR-imit aamma ilisimatitsissutigisinnaavarput qallunaat suliffeqarfii toqqaannartumik Kalaallit Nunaannut nassiussineq ajoraluartut soorlu Jysk aamma Ikea nassiussalerisut allat suleqatigalugit umiarsuakkut Kalaallit Nunaannut nassiussisinnaasarmata.