Qallortut tigummigallagassanngortinneqarput
![](/sites/default/files/styles/image_934x467/public/article_images/greenpeace_kravler_op_17_juni_630_0.jpg?itok=F0n1TrIw)
Greenpeacermiut taakku marluk, aappa generalsekretæri afrika kujallermiuuvoq, Kumi Naidoo aappaalu norgemiuulluni. Cairn Energyp qillerivianut qaqillutik qilleriviup naalgaanut piumasaraat qillerineq unitsinneqartariaqartoq. Tamatumali kingorna nalunaaquttap akunnerani ataatsimi ikisimareersut politiinit tigusarineqarput.
Nuup Eqqartuussiviani aalajangiineq Nunatta Eqqartuussivianut ingerlateqqinniarlugu eqqartuunneqartut aalajangerpaat. Tassalu maanna Nunatta Eqqartuussiviata aalajangertussanngorpaa tigummigallagaasut sivisunermik tigummigallagaassanersut imaluunniit Danmarkimi nunat allamiut tikittartut sullissivianni aalajangiinissaq utaqqinerani iperagaassanersut.
Taama nalunaarpoq vicepolitimester Morten Nielsen, taassumalu Nuup Eqqartuussiviata aalajangiinerat nuannaarutigaa:
- Danmarkimi nunanit allani tikittut sullissiviannit anisitaanissaannut suliaq naammassinissaata tungaanut maani politiinit tigummineqarallassapput. Tamatumalu kingorna maanngaanniit anisitaanissaat sulissutigineqalerumaarluni, Morten Nilesen oqarpoq.
Tigummigallagaasut marluk isumaqarput sivisunerusumik tigummisaagallarnissartik pissutissaqanngitsoq.
Morten Nielsen unnerluussisut isumaqarnersut suliaq ima imaannaanngitsiginersoq allaat unnerluunneqartut iperagaagallarnissaat mianersuunneqartariaqarnersoq pillugu aperineqarami ima akivoq:
- Imatorsuaq tamanna isigineqartariaqanngilaq. Nunat allamiut anisitaanissaannik aalajangernissaq utaqqillugu periuseq taanna atortarparput, tassalu politiinik tigummigallagaasarlutik. Pisumut uunga qanoq iliuuseqarnitsinnut pissutaaneruvoq, Greenpeacekkut angallataa Esperanza Nunatta qanittuniimmat, taamaalillutillu maanna tigummisagut illoqarfimmi najugaqartikkaluarutsigit angallammut qimaasinnaanerat aarleqqutigigatsigu, tassalu taamaaliorpata aamma aarleqqutigaarput qillerivimmut qanoq iliuuseqaqqinnissaat immaqalu angallammut Esperanzamut ikillutik maannaanniit qimaanissaat aarleqqutigigatsigu.
Tassa imaappa qanoq iliuuseqaqqinnissaat aarleqqutigigissi?
- Aap, taamaattoqaqqissinnaanera aarleraarput, Morten Nielsen oqarpoq.
Greenpeacermiut 18-nit qillerivimmut ikinerisa kingorna juunip sisamaani aamma politiinit tigusaapput, tassalu Leiv Eirikssonimut ikillutik akornusersuinerit ullumi pingajussaa pilluni.
Greenpeacermiut qillerummut 500 meterit ilummut appakaateqqippata, taakku ullormut 375.000 koruuninik akiliisinneqartarnissaat Hollandimi eqqartuussiviup aalajangiuteqqammerpaa.