Qalerallit akii Nuummi Uummannallu eqqaani assigiinngeqaat
Aalisarnermut naalakkersuisoq Ane Hansen, Inatsisartunut ilaasortamut Kristian Jeremiassenimut, Siumumeersumut akissummini ilisimatitsivoq, Uummannap eqqaani qalerallit kiilumut 6 koruuni 79 øremiit 11 koruuni 30 ørimut akeqartinneqartartut, matumani apeqqutaalluni qalerallit 3,5 kiilumit oqinnerunersut oqimaannerunersulluunniit.
Taavani tunitsivigineqartartut tassaapput Uummannaq Seafood aamma Royal Greenland.
Nuummi tunisinernut akinut sanilliussigutta, Romark Seafood aamma Royal Greenland kiilumut 13 koruunit 16 koruunillu akornanni akeqartitsisarput.
KNAPK-mi allaffiup pisortaata Alfred Jakobsenip oqaatigaa, akit assigiinnginnerujussuannut, Nuummi qaleralinnik amigaateqartoqarnera pissutaasoq.
- Nuummi tunitsiviusartut pisiassaaleqiinnarput. Taamaattumillu aalisakkanik qaffasinnerusumik akeqartitsillutik, Alfred Jakobsen oqarpoq.
KNAPK Uummannap eqqaani tunisinermi akinik qaffaanissamik suliniuteqarsimagaluarpoq, tamannali ajornakusoorsimasoq oqaatigaa. Ilaatigut Royal Greenland tamaani ingerlatsisuni nukittuujummat sunneruminaallunilu.
Taamaattorli taassuma neriuutigaa, KNAPK isumaqatigiinniarnerni angusaqarluarumaartoq, tassa aalisarnermut naalakkersuisup Ane Hansenip Uummannap eqqaani ukiunut marlukkaartumik pisassiisalernissamik neriorsuutaa eqquutsinneqarpat.
- Tamanna tunisassiornerup aalisarnerullu pitsaanerusumik pilersaarusiorsinnaanissaanut periarfissiissaaq, Alfred Jakobsen naggasiivoq.
