Qaleralittaassiissutit nikingaqisut
Aalisarnermut Naalakkersuisoqarfiup qaleralinniarsinnaanermut akuersissutinik maajip 24-anni tunniussai naapertorlugit Upernavimmi 6 meterinik anginermik aalisariutaatilik Uummannami Qeqertarsuullu Tunuani aalisartunit, agguaqatigissiitsinikkut, amerlanerungaartunik qaleralinniarsinnaavoq. Uummannamilu umiatsiaararsortoq Upernavimmi Qeqertarsuullu Tunuani aalisartunit amerlanernik, agguaqatigiissitsinikkut, qaleralissinnaalluni.
KNR.gl-mi naatsorsuinitta takutippaa Upernavimmi 6 meterinik anginermik aalisariutaatilik 89 tonsinik qaleralissinnaasoq, Qeqertarsuup Tunuani aalisariutaatilik 66 tonsinik pisaqarsinnaasoq, Uummannami 53 tonsinik qaleralissinnaasoq. Upernavimmi aalisartoq Uummannami aalisartumit 36 tonsinik pisaqarnerussalluni. Uummannamili umiatsiaararsortoq 16 tonsinik qaleralissinnaavoq Qeqertarsuup Tunuani umiatsiaararsortoq 14 tonsinik pisaqarsinnaasoq Upervavimmi 11 tonsinik.
Akuersissutaatillit pisassaasa amerlassusaat allanngorarsinnaavoq, akuersissutaatillit 2009-mit 2011-mut pisaat agguatigiisinneqarmata. 2009-mi pisarineqartut 20 procentimik tunngaviliisuullutik, 2010-mi pisat 30 procentinik kiisalu 2011-mi pisarineqartut 50 procentinik.
Aqutsiveqarfinni pingasuusuni: Qeqertarsuup Tunuani, Uummannami Upernavimmilu qaleralittassiissutigineqartut katillugit 20.500 tonsiupput. Qeqertarsuup Tunuani 8.000 tonsiullutik, Uummannami 6.000 tonsit Upernavimmilu 6.500 tonsit.
Qeqertarsuup Tunuani 6 meterinik anginerusunik aalisariutaatillit 70-it akuersissummik tunineqarsimapput, Uummannami 43-it Upernavimmilu 38-it. Qeqertarsuup Tunuani umiatsiaararsortut 235-it, Uummannami 225-it Upernavimmilu 274-it.
Aalisarnermut Naalakkersuisoq Ane Hansen sapaatip akunnerani kingullermi erseqqissaavoq pisassiissutinik pigisassat naammassillugit juuli aallartissimaleriarpat nalunaarutigineqassasut.
