Qaleralinnut tunitsivik manna tikillugu iluatsinngilaq

Nukik Seafoodip umiarsuaq Nuup amutsivianiit attartugaa Arctic Pioneer, oktobarimili Qaanaap nunaqarfiisa ilaanni Savissiviup eqqaani misiligummik sikkutitinneqarpoq. Taama umiarsuup sikkutitinneqarneranut siunertarineqaraluarpoq piniartut umiarsuarmut qaleralinnik tunisisassasut.

Qaanaalli eqqaa qangatut ililluni ukioq manna sikunngimmat qaleralinnik tunisineq ingerlalluanngitsoq umiarsuup tunitsiviup akisussaasua Petrus Biilmann oqarpoq.

- Inuit tamarmik nalunngisaattut silaannaq allanngornikooqaaq, sikuugaluarpoq kisiannili qanittoq allaat tikillugu Qaanaap, Savissiviup, Kap Yorkillu tungaanut imaannanngoqattaarpoq, taamaammat aalisarneq suli ingerlatilerneqanngilaq, oqarsinnaavugullu suli qaleralinnik tunisisoqanngitsoq, Petrus Biilmann oqarpoq.

Taanna erseqqissaavoq qaleralinnik tunisiniarnerugaluaq taama ingerlaannassappat sikuerluariarpat umiarsuaq kujammut ingerlaannartussanngussasoq.

- Iluatsinnginneranut peqqutaasut arlaqarsinnaapput, eqqumiitsumik sikuniarnera arriitsuararsuusimavoq, sikugaluaramilu piffissaq qanittoq tikillugu allaat imaannanngoqattaarluni pivoq. Taamaammat piniartunut siku piniarfigissallugu navianarsimavoq, Petrus Biilmann oqarpoq.

Taanna aamma oqarpoq sikuernissaata tungaanut umiarsuaq tappavaniissasoq. Neriuutigaalu aallarnissaata tungaanut qaleralinnik tunisisoqarumaartoq immilaarlugu kujammukartissinnaanerussammat.

Aperaarput taamatut misiliinialeramik qanorpiaq takorluugaqarsimanersut.

- Tusartakkagut malillugit Savissiviup eqqaani angisuunik aalisarluarneqarsinnaasunik qaleraleqarsimavoq, tamannali suli uppernarsinngilarput. Taamaallaat qaleraleerannguit mikisut tunisassiarisinnaanngisagut tulaanneqaraluarput taakkua taquassatut ilanngutiinnartussaasavagut, taama oqarpoq Petrus Biilmann. Taassuma Qaanaap eqqaani piniartut kajumissaarpai umiarsuarmut tunitsivimmut qaleralinnik tunisisaqqullugit.