Qaleralinnut tisassut pissarsiarisariaqarpoq

Nukik Seafoodip qaleralittassiissutit amigartoorutaanngitsumik naammassissappagit, qaleralinnut 1 kiilu inorlugu angissusilinnut tisanermut maskiinamik pissarsisariaqarput.

Qalerallip nerpia annerusoq tunisassiarineqassappat inuup assai atornagit maskiinali tisanermut atortoq pisariaqartinneqarpoq. Kisianni qaleralinnik tisassutaasinnaasoq imaaliallaannarluni pissarsiassaanngitsoq, Nukik Seafood A/S-ip pisortaa Petrus Biilmann oqarpoq.

Namminersornerullutik Oqartussat Nukik Seafood A/S-imut qaleralittassiissutaat 600 tonsiupput. Taakkunannga 518 tonsit pisarineqarsimapput, ilaallu 264 tonsit kiilu inorlugu oqalimaassusillit peqqissaartumik tisaajusariaqarput, nerpia annerpaaq pissarsiarisinnaajumallugu.

-Assaannarmik tisaneqassagunik imminut akilersinnaanavianngitsoq, pisortap nalilerpaa.

Namminersornerullutik Oqartussat qaleralittassiinermut - pisaralugillu tamarmik nunami tisaneqarnissaannut - piumasaqaat naammassisinnaajumallugu Nukik Seafood A/S Arctic Green Foodip suliffissua peqatigalugu tamaviaarluni iluatsitsiniarsarivoq.

Petrus Biilmann, Nukik Seafood A/S-imi pisortaq oqarpoq, piffissami matumanerpiaq oquuttanut tisassummik attartorfissaminnik ujaasillutik. Attartornissaminnut iluatsitsingajavissimagaluarput, piginnittulli nammineq maskiina atortariaqalersimammagu maanna allamik ujaasineqarpoq. Maskiinamik pioreersumik attartortariaqarpugut, nutaaq akisuallaassammat. Iluatsikkusoqaarpullu, Petrus Biilmann erseqqissaavoq.

Naalakkersuisut qalerallit 600 tonsit Qaqortumi suliffissuarmi suliarineqartussatut Nukik Seafood A/S-imut siorna pisassiissutigaat, naammassineqarnissaallu Aalisarnermut pisortaqarfimmit alaatsinaanneqassasoq, pisortaq Amalie Jessen oqarpoq.