Qaleralinniarneq akilersinnaanerusinnaavoq

Nunatsinni qaleralinniarneq imminut akilersinnaanerulissappat pitsanngorsaavigineqartariaqarpoq, pitsanngorsaanerillu qaleralleriviit qalerallerisullu ikinnerulernerannik kinguneqartariaqassapput. Kalaallit Nunaanni Aningaasatigut Atugarisat Pillugit Siunnersuisartutut ataatsimiitsitat, nalunaarusiaminni nutaami taama naliliipput.

Nunatsinni qaleralinniutit katillutik 175-iupput, taakku saniatigut umiatsiamik ukiukkullu qimussimik qaleralinniartartut amerlangaatsiarlutik.

- Kalaallit Nunaanni qalerallerinermik inussuutissarsiuteqartut, qaleralittaasartunit iluanaarutinut sanilliukkaanni amerlavaallaarsorinarput. Taamaattumik qaleralinniarneq iluanaarutaallualissappat qaleralinniarnermi atortorisatigut pitsanngorsaasoqartariaqassaaq, atortutigullu pitsanngorsaaneq sulisunik ikilisaanermik kinguneqartarpoq, Kalaallit Nunaanni Aningaasatigut Atugarisat Pillugit Siunnersuisartutut ataatsimiitsitat, nunatsinni aningaasarsiornikkut ineriartorneq pillugu nalunaarusiaminni saqqummiuteqqammisaminni taama ilaatigut isummersuuteqarput.

Qaleralinniarnermi pitsanngorsaaneq qalerallerisukillisaanermik kinguneqarpat, qalerallerisut inuussutissarsiutinut allanut ilinniarteqqinneqartariaqassapput. Qalerallerisut suliffissaaruttut soorlu sanaartornermi iluaqutiginiarneqarsinnaasut, Ataatsimiitsitap aningaasarsiornermut ilisimatuui naliliipput.

- Kalaallit Nunaanni sanaartornikkut suliassat amerliartuinnartillugit sanaartornermi sulisut amerlanerusut atorfissaqartinneqalissapput, taamaattumillu qalerallerisuusimasut sanaartornermut ilinniarteqqinneqarsinnaanissaat pissusissamisoortuusoq, Kalaallit Nunaanni Aningaasatigut Atugarisat Pillugit Siunnersuisartutut ataatsimiitsitat naliliipput.