Qaleraleqassuseq Upernavimmi aalisartut misissoqquaat

KNAPK-p siulittaasua Leif Fontaine kattuffik sinnerlugu Upernavimmi eqqaanilu aalisartut misissuisoqarnissamik kissaateqarnerat pillugu Naalakkersuisunut Pinngortitaleriffimmut allagaqarpoq.

Upernaviulli eqqaani qaleraleqassutsimik misissuisoqareersoq, Pinngortitaleriffimmi immikkoortortami pisortaq Helle Siegstad oqarpoq.

Misissuisimanerit naammanngitsut KNAPK-p siulittaasua Leif Fontaine oqarpoq:

-Upernaviup avannaani qaleraleqassutsip misissuffigineqarnerata annertusarneqarnissaa aalisartunit piumsaarineqarpoq, naluneqanngimmat qalerallit avannarpasinnerusumi aalisarneqarsinnaasut, taamaasillutillu qaleralittassiissutit amerlineqarsinnaallutik, Leif Fontaine oqarpoq.

Pinngortitaleriffimmi biolog Helle Siegstad radioaviisimut oqarpoq, Upernaviup eqqaani qaleraleqassuseq ukiut qulit matuma siornatigumut naleqqiullugu millisimasoq.

Ilulissani tamanna ukiut qulit matuma siornatigut misissuinermi takuneqarsinnaavoq. Qalerallit millisimapput.

Upernaviup eqqaani qalerallit nungusaataanngitsumik aalisarneqarnissaat biologinit innersuussutigineqarpoq, qalerallimmi Upernaviup eqqaani alliartortarmata.

Qalerallit Upernaviup eqqaaniittut ukiut qulit matuma siornatigumut naleqqiullugit centemeterinik qulinik mikinerulersimasut, biolog Helle Siegstad KNR-imut oqarpoq.

Qalerallit aalisarneqartarnerisa annikillisineqarnissaanik biologit innersuussuteqarnerannut Knapk oqaaseqarusunngilaq.

- Qaleralinnik pisassiinermi naalakkersuisut akisussaasuupput, taanna allanngortikkuminaappoq. Knapk pisassiissutinik aalajangiisartuunngilaq, Knapk naalakkersuinikkut sulianut akulerussinnaannngilaq, siulittaasoq Leif Fontaine oqarpoq.

Qalerallit mikisut 5 millionit ukiumut aalisarneqartarput. Ukiut qulit matuma siornatigut qalerallit anginerujussuusimapput, ullumikkut pisat katillutik oqimaaqatai taamanikkut 4 millioniusimallutik, qalerallit taamani anginerummata.