Qalasersuarmi 10 gradinik kiannerusoq
![Arktis](/sites/default/files/styles/image_934x467/public/article_images/arktis_2.jpg?itok=2h0VBEY2)
Qalasersuup nalaani ukiup taamaalinerani pisarnermit 10 gradinik kianneruvoq, aamma Issittup imartaa aatsaat taama sikuunngitsigaaq, silasiortut taama nalunaarput.
- Qalasersuarmi minus 13 gradinik maannakkorpiaq nillertigivoq. Ukiup taamaalinerani pisarnermit 10 gradinik kianneruvoq, DMI-mi sikumik ilisimatusartoq issittumi pissutsit pillugit immikkut ilisimasalik Rasmus Tonboe taama oqarpoq.
Imartaq maanna sikuusoq 10-20 gradinik nillertigivoq. Pisarnermilli kiannerungaatsiarpoq.
Oqaluttuarisaanermi nutaajunerusumi 2015-imi aatsaat taama kiatsigivoq 2016-imilu suli kiannerunissaa ilimanaateqarluni.
Sikujartornera kigaatsuaraavoq issittup imartaa suli kiammat. Tamannalu pissutigalugu sikuniaatarivoq, naak tamanna septembarip kinguninngua pisaraluartoq.
Immap kiannerunera pissutigalugu silaannaq aamma kianneruvoq. Karap imartaa Sibiriap avannaaniittoq, Tjukterillu imartaa Alaskap Rulandillu akornanniittoq taamaalinerani sikuusaraluarput, Rasmus Tonboe nassuiaavoq.
- Imarli ukioq manna kiappallaarpoq. Taamaammat nilloriartornera qeriartornissaalu sivisunerussapput. Baffinip kangerliumarngani aamma kingusinnerusukkut sikusussaassaaq, DMI-mi ilisimatooq taama oqarpoq.
/ritzau/