Qalasersuaq sikukilliartuinnarpoq
Ilisimatuut avataarsuaniit immap sikuanik malittarinnittut oqaatigaat ukioq manna immap sikua tallimassaanik aatsaat taama siaruarnikitsigisimanera uuttorneqartoq. Taama pileriartornera uppernarsarneqarpoq, tassami immap sikuata siammarnikinnerpaaffii arfiniliusut ukiuni kingullerni arfinilinni uuttorneqarsimammata.
Qanittumut allaat issittup sikuata annersaa minnerpaamik aasami ataatsimi - sivisunerusumilluunniit - atasinnaasorineqaraluarpoq. Ilisimatuulli Colorado Universitetiminngaanneersut Charles Fowlerimit siulersorneqartut tassa maanna atuagassiamut Ingeniørenimut oqaatigaat, ukiuni kingullerni annilaarnartumik allanngortoqarsimasoq.
Ukiup sikuata saattup, tassa ukiut tamaasa aattartup qereqqittartullu, ukiumi issittup imaata sikuata 70 procentia angusarpaa. Tamannalu 1980-ikkut 90-ikkullu kingornagut 50 procentit missaanni annertuseriarnerulluni. Tassalu aamma imaappoq, siku issunerusoq ukiuni marlunni amerlanerusuniluunniit atasartoq maanna imaata ukiumi sikuata taamaallaat 10 procentiinnaraa, siornatigut 30-40 procentit missaanniittaraluartoq. Issittup imaata sikua nunarsuup silaannartaanut nillarsaataavoq, saalissappallu tamanna issittumi peqqissusermik taaneqartartumut sunniuteqarsinnaalluni.