Qalasersuaq pillugu Danmark uppernarsaatissaqarnerulerpoq
Sverigimiut sikusiutaat Oden iluatsittumik Qalasersuarmut angalareerluni uteqqammerpoq. Massakkut angalanermit aamma siusinnerusukkut angalasarneranit paasisat najoqqutaralugit, naalagaaffeqatigiit piumasaqaataat tunngavissaqartoq naatsorsuutigineqarpoq.
- Sikunut tunngasut ilungersunaraluaqisut Odenip angalaneranit nalunaarutigineqartut annerusumik isumalluarnartuupput, paasissutissallu pissarsiarisassatut naatsorsuutigisavut maanna pissarsiarineqarput. Tamanna piumasaqaatitta tunngavilersornissaannut isumallualersitsivoq, Helge Sander oqarpoq.
Immap naqqata nunavimmut atasortaata killingata misissuiffigineqarnera 2002-mi aallartinneqarpoq, matumanilu siunertarineqarluni Nunatta Savalimmiullu eqqaanni immap naqqani pisuussutinut Naalagaaffeqatigiit pisinnaatitaaffeqarnerisa uppernarsarneqarnissaat.