Qalasersuaq nunatut pigineqanngitsutut inissisimalersinnnaavoq

- Ilimagaara Ruslandip aamma Danmarkip, immaqalu nunap allap Qalasersuup eqqaa oqartussaaffigiumassagaat. Tamannali isumaqarpallaanngilaq. Qalasersuarmummi pilerngunneq timitaqarpallaanngilaq. Taamaattumik ilimagaara piumasaqaateqartut tamarmik isumaqatigiissutigisinnaagaat Qalasersuaq 50 sømilinik kaajallallugu pigineqanngitsutut inissinneqassappat. Kontreadmiral Nils Wang, Forsvarsakademimi pisortaq, taama naliliivoq.

Taanna Nunanut allanut tunngasunik Danmarkimi ilisimatusarfimmi, Issittumi isumannaallisaaniarnermut politikki pillugu, ippassaq saqqummiussaqarpoq. Nils Wangillu Issittoq pillugu sorsulertoqarsinnaanera pissuteqarsorinngilaa:

Killeqarfilinngusaaffiusoq immap naqqata nunavimmut atasortaaniittoq, niuerfiusinnaasup killeqarfiata avataaniippoq. Tamannalu isumaqarpoq pisuussutit eqqartorneqartut nunat killeqarfiisa iluanereersut, soorlu matumani Danmarkip aamma Kalaallit Nunaata killeqarfiisa iluanereerlutik. Nils Wang taama nassuiaavoq.

Naatsumik oqaatigalugu Issittumi pisuussutit nunanut issittumiittunut agguaanneqarsimanngitsut annertunngillat, Nils Wang oqarpoq.

- Tartupaluk pillugu qanittukkut saqitsaattoqarnera matumani assersuutissaqqippoq. Saqitsaassutigineqarnissaami orniginartinneqanngimmat. Qalasersuarmi immap naqqani erfalasulerneq, oqarlunilu Qalasersuaq pigineqalersoq aamma assersuutigineqarsinnaavoq. Taama nipilimmik iliuuseqarneq kingunerlutsitsisarpoq. Ajornartorsiutip qeqqanik uniuinerulluni, Nils Wang oqarpoq.

Sakkutuulersortoqalernissaanulli ernumassutissaqanngitsoq, Nils Wang isumaqarpoq:

- Illuatungeriit tamarmik tamaani aningaasarsiorluarsinnaanissartik ilisimavaat, manngertisaarnissaminnullu pissutissaqaratik. Taamaammat sakkutuulersulernissaminnut aamma pissutissaqarsorissanatik, Nils Wang oqarpoq.