Qalasersuaq aasaq manna sikuerussinnaavoq
Nunarsuarmi silap kiatsikkiartornerata kingunerisai ilisimatusaatigineqartuartut aarlerititsipput.
Qalasersuaq aasaq manna sikuerutereersimassaaq,
silap pissusianik ilisimatusartut kingullertigut taama aarlerisaaripput.
Sikup aalaakkaasup aakkiartornera sukkatsikkiartuinnavippoq.
Imaata sikua siornamut naleqqiullugu 8.000 kvadratkilometerimik anginerusoq ullormut aattassangatinneqarpoq.
Angissusia assersuusiussagutsigu qeqertarsuartut Disko-tut angitigisoq ullormut aattassasoq, naatsorsuinerit US National Snow and Ice Data Center-imeersut takutippaat, aviisi Information ullumi taama aallaaserinnippoq.
Sikuiuitsumi sikup aakkiartornerata sukkatsinnera ukiut tamaasa takussutissarsisinneqartuarpoq.
2005-i rekordiliiffiuvoq, taannali 2007-imi qaangerneqarpoq, imaani siku siorna 23 procentimik milleriarmat.
Rekordiliineq – taama taassagaanni – ukioq manna qaffariaqqissangatinneqarpoq. Siku aasaanerani siornatigut takussaasarsimasoq ukiut 50-it ingerlanerini affaannanngorsimavoq.
Amerikamiut paasisaat ilisimatusartunit allamiunit taperserneqarput.
Norgemiut ilisimatusartui nunatsinni Tunup-Avannaarsuaneeqqammerput, tassanilu siku saalisimasorujussuunerarpaat aalaakkaasuujunnaarsimanerarlugu.
Siku maanna takussaalersoq ima saalisimatigaaq, anorimit sarfamillu nalloriaannaasalerluni. Silallu kiatsikkiartornera sikujumaataarnerulersitsisoq, norgemiut paasivaat.
Silap pissusianik ilisimatooq David Lawrence paasisanik kingullernik aamma atuagassiami Geophysical Letters-imi aqagu saqqummiussaqassaaq.
Paasisat taakku sikup sermersuullu aakkiartupiloornera peqatigitillugu nunami qeriuaannartup aakkiartupiluulerneranik imaqarput.
Qeriuaannartup aakkiartorneratigut gassit silaannarmik kissakkiartortitsisartut anianerulissanerarneqarput, silap ilisimagisamit allangorneruneranik kinguneqartussamik, Lawrence allappoq.
Naalagaaffiit Peqatigiit sila pillugu ataatsimiititaliaani ilaasortat Bonnimi ataatsimiinnerminni saqqummiuppaat, nunat suliffissuaqarfiusut CO2-mik aniatitaasa ukioq 2020 tikitsinnagu 25-40 procentinik millisinnissaat pisariaqavissoq, pingaartumik silap nalinginnaasumit to gradinik kiannerulernissaa pinngitsoorniassagaanni.
Bonn-imi ataatsimiinneq aqagu naammassissaaq.
