Qalasersualerngusaanneq oqallissutaassaaq
Qalasersualerngusaanneq suli ingerlajuarsinnarpoq. Amerika nunasiaatinngortinneqarmalli aatsaat taama nunamik/immamik piginnittuulernissamik piumasaqaat angitigisoq, ilisimatuunit oqaatigineqarpoq.
Issittup ilaa - qalasersuaq - tassaalersimavoq issittumi nunallit politikkikkut akersuuffissuat. Danmark akuunermigut pingaaruteqartumik tassani aamma inissisimavoq.
Killeqarfiit pillugit ilisimatuut misissukkatik pillugit oqallinnissamut tunngavissanik saqqummiissapput.
Copenhagen Business Schoolimi ilinniartitsisoq Jeppe Strandsberg aamma Københavnip Universitetiani ilisimatooq Ulrik Pram Gad saqqummiisuussallutik.
Strandsberg Issittumi nunat killeqarfitik annerulersinniarlugit iliuuserisaat pillugit misissukkanik saqqummiissaaq, Pram Gad-ilu sakkutooqarnikkut isumannaallisaanermi ileqqut pillugit aamma Kalaallit Nunaata Danmarkillu imminnut attaveqarnerannik ilisimatusaatinik saqqummiissalluni.