Qajuusat Food Line toqunartumik akoqarmata nioqqutigeqqusaajunnaarput

Qajuusat aalajangersimasut Food Line-nik ilisarnaatillit Inuussutissaqarnermut aqutsisoqarfiup nioqqutigeqqujunnaarlugit utertippai. Qajuusat taakku Kalaallit Nunaanni pisiniarfinni arlalinni nioqqutigineqartarput, soorlu Pisiffimmi, KNI Pilersuisumi aamma Kamimmi.
apriilip 22-at 2008 17:00

Qajuusat taakku misissoqqissaarneqarmata navianartunik annertuumik akoqartut, tassa svampegiftinik, paasineqarput.

Qajuusat 2 kiilukkaarlugit poortugaapput, massakkullu tuniniarneqartut aappaagu 2009-mi marsip ulluisa tallimaannut killeqarput.

Food Line-nik qajuusarsisimasut qajuusarsiatik pisiniarfimmut pisiffigisimasaminnut utertitseqqullugit Inuussutissaqarnermik aqutsisoqarfiup kaammattorpai.

Taamaammat Food Line-nik 2 kiilukkaanik aappaagulu marsip ulluisa tallimaannut killilinnik pisisimaguit atorniaqinagit.

Toqunartoq qajuusaniittoq soorlu iffiorfiup kissassusaanit peerneq ajorpoq. Toqunartortortoorsimagaanni meriarujussuartoqarsinnaavoq, qajuusallu taakku sivisuumik atorsimagaanni timip nappaammut akiuussutissaa aamma sakkukillisinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq