Qaasuitsup Kommuniata kommunalbestyrelseata ataatsimiinnerani susoqarsimasoruna?

Radioaviisimit sukumiisumik paasiniarparput sooq suullu tunngavigalugit ataatsimiinneq unitsinneqarsimanersoq.

Ataatsimiinnerup unitsinneqarneranut pissutaanerpaagunarput, aningaasat 4,5 million koruunit, taakku uuliasiornermi sulisut ilinniarteqqinnerinut atugassaasut.

Qaasuitsup Kommuneani kommunalbestyrelsep ataatsimiinnera tallimanngormat ikerinnakkut unitsinneqarpoq.

Kommunalbestyrelsep ataatsimiinnissaralua aammalu qangali pilersaarutaareersoq, 257.000 koruuninillu akissaajaataasoq aallartilaaginnartoq sooq taamaatiinnaarneqarnersoq uani erseqqissariaraluassavarput. Paasiniaanitsinni politikerit apersukkavut amerlanerit kinaanerminnik taaseqqusinngitsut oqaatigeqqaassavara.

Paatsiveerusimaarneq aallartippoq, sisamanngornermi septembarip quligiluaanni unnukkut, tassa kommunalbestyrelsemi ataatsimiiffissaq ulloq sioqqullugu.

Suleqatigiit IA aamma Siumut naapipput, oqaloqatigiissutigaallu aningaasat 4,5 million koruunit sumut atorneqarsimanerinik paasissutissartaqanngitsut. Allatut paasillugu, aningaasaliisimaneq inatsisit eqqortut atorlugit pisimanngitsoq paasisimasorigamikku. Tamannarpiarlu tunngavilugu borgmesterertik, Jess Svane, ataatsimeeqataaniassammat sulinngiffeqarneranit angerlartinniarlugu isumaqatigiipput.

- Suleqatigiit ataatsimiinnitsinni isumaqatigiiassutigaarput, borgmester Jess Svane piaarnerpaamik sulinngiffeqarnerminit utertariaqartoq, tassami ilisimalikkatsinnik qulaajagassanik suliassaqartikkatsigu pisariaqarsorigatsigulu kommunalbestyrelsep ataatsimiinnerani peqataassasoq, Danmarkimi nalunaaqutaq unnuami marlup qeqqalernerani sianerfigaarput, akinngilarli, kinaanerminik taaseqqusinngitsoq radioaviisimut oqarpoq.

Aningaasanik 4,5 million koruuninik eqqunngitsumik pisoqarsimanera, Siumup gruppianni siulittaasup, Karl Kristian Kruse-p uppernarsarpaa, taannalu ima oqarpoq:

- Aningaasat sumut atorneqarsimanerannut nassuiaasoqareerpat aatsaat ataatsimiinneq nangeqqiniarlugu isumaqatigiippugut.

Tallimanngornerup unnuaani Siumut IA-lu suleqatigiillutik borgmesterimut mobilikkut sms-imik nassitsipput, allallutik pinngitsoorani qarasaasiakkut allakkat atuartariaqarai, tassani paasissutissat pingaartut Jess Svanep atuassammagit.

SMS-imik nassinneqarsimalluni Jess Svanep uppernarsarpaa, sumulli tunngasuteqarnersut oqaatigerusunnagu.

Allagarsiamili imarisai ernumanartoqartissimagamigit, tallimanngornermi kommunalbestyrelsep ataatsimiinnerata aallartinngilaattaani Ilulissanut ataatsimiiffimmut sianerpoq.

Kommunalbestyrelsep ataatsimiittarfiani issiapput ataatsimeeqataasussat inuit 21-t. Taakkulu tupaalaatigisaannik borgmester Jess Svane oqarasuaatikkut ataatsimiinnermi peqataalersimavoq.

Kommunalbestyrelsemi ilaasortat ilaat, aterminik oqaatiginneqqusinngitsoq ima oqarpoq:

- Borgmesterimut taartaagallartoq, Timooq Mølgaard tikilluaqqusivoq, tupaallaatigeqaarpullu borgmester Jess Svane oqarasuaatikkut peqataasoq paasigatsigu. Taamaattoqarnera paasineqarmat ataatsimiinneq unitsikkallarneqarpoq, tassalu IA aamma Siumut naapipput, tamatumalu kingorna ataatsimiinnerup unitsinneqarnissaa siunnersuutigineqarpoq, taama oqarpoq ilaasortaq aterminik isertuussiumasoq.

Jess Svane KNR-imut ima oqarpoq:

- Uanga akisussaasutut qullersatullu piumasaraara ataatsimiinnerup unitsinneqarnissaa, aatsaallu uteruma ataatsimiinneq nangeqqinneqassasoq siunnersuutigalugu.

Tassa maanna paasivarput aningaasat 4,5 million koruunit ernummatigineqarnerannut IA, Siumut aammalu borgmester Jess Svane ataatsimiinnermik unitsitsisut.

Aningaasat taakku 4,5 million koruunit, uuliasiornermi aammalu aatsitassarsiornermi sulisunik ilinniartitseqqiinermut atorneqarsimagunarput. Radioaviisip paasisai naapertorlugit taakku aningaasat Aasianni ilinniartitseqqiinermut atorneqarsimapput. Tamannarpiarlu tunngavilugu Siumut aamma IA isumaqarsimapput aningaasat sumut atorneqarsimaneri pissutissarinngisamik ingerlanneqarsimasut, taamaammallu borgmesterertik attavigisimallugu.

Taava apeqqut unaalerpoq: Ilumut anigaasat taakku aningaasaliisutaappat kukkunikkut?

- Taamaattoqanngilaq, taakku upernaarli aningaasaqarnermut ataatsimiititaliap suliarereerpaat, uuliasiornermi sulisunut pikkorissartitsinermut atorneqassallutik, aterminnik taaseqqusinngitsut arlallit radioaviisimut oqarput.

Taakku aamma oqarput aningaasat pineqartut tassaasut takornariaqarnermik sullissivimmit, Destination Avannaanit sinneqartoorutit uuliamik sulisut pikkortissartinneqarnerannut atugassat.

Tamanna uppernarsarneqarsinnaavoq. Tallimanngormat kommunalbestyrelsep ataatsimiinnissaraluani oqaluuserisassanni qupperneq 6-mi atuarneqarsinnaavoq, "aningaasat allanut inissinneqassasut" ilaatigut Destination Avannaaniit "uuliasiornermi sulisut pikkorissartinneqarnerinut".

Aningaasaqarnermut ataatsimiititaliap aalajangernera ilumoorpat, taava paatsoortoqarsimassaaq. Paatsoornerullu kinguneranik kommunalbestyrelsep ataatsimiinnissaralua asuliinnarsuaq unitsinneqarsimassaaq.

- Tamannalu ilumoorpat, kina pinerpoq pissutsinik ilisimaqarsimassanngilaq, aammalu aningaasaqarnermut ataatsimiititaliap aalajangigaannut sianigisaqarsimanani. Ataatsimiinnerni sinittoqartarsimassaaq. Kingumut qiviaraanni kukkunerujussuuvoq ataatsimiinnerup taamaatiinnarneqarsimanera, kinaassutsiminik isertuussaqarusuttoq Radioaviisimut naggasiivoq.