Qaasuitsup Kommuniani suli paatsiveerusimaarput
Aamma tallimanngornermi ataatsimeeriaraluarnerup aqunnneqarnera sakkortuumik isornartorsiorpaat.
- Aningaasaqarnermik misissuigasuartitatta suliaat, kommunip aningaasatigut qanoq inisseratarsinnaaneranik tunngasoq annertunerujussuarmik oqariartuuteqarpoq. Qaasuitsup Kommuniata kommunalbestyrelsiani Inuit Ataqatigiit gruppiata siulittaasua Edvard I Kristiansen oqarpoq.
Tassalu paatsiveerusimaarneq suli ingerlavoq Qaasuitsup Kommuniata aningaasaqarnera maannamut oqaatigineqareertunit ajornerusumik inissisimassasoq, Inuit Ataqatigiit kommunalbestyrelsemi ilaasortatitaasa aarleqqutigaat.
Ikinnerpaanik 15 millioni koruuninik ukiup sinneranut sipaarutissarsiornissaq kommunalbestyrelsep septembarip qulingani atatsimiinnissaaraluani aalajangiiffigisassat pingaarnersarigaluarpat.
Inuit Ataqatigiilli aarleqqutigaat, minnerpaamik 30 millioni koruunit sipaarutigineqartariaqartut.
- Suleqatigiit Inuit Ataqatigiit Siumullu taannali sioqqullugu nalunngereerparput, sipaarutigisariaqakkat imaassinnaasoq marloriaatinngorsinnaasulluunniit, Edvard I Kristiansen oqarpoq.
Avannaata kommunerujussuani paatsiveerunneq aamma allamik ilaqarpoq:
Inuit Ataqatigiit, Siumut suleqatigalugit, amerlanerussuteqartut aamma tallimanngormat ataatsimiileraluarnerup aqunneqarnera isornartorsiorpaat, oqarlutik borgmesteriugallartup Timooq Mølgaardip borgmester Jess Svane akuliutimmagu inatsisinik uinioqqutitsinerusoq. Aamma kommunip pisortaanera kukkusumik siunnersuisimasutut isornartorsiorpat.
- Inuit pingasut taakkua kommunalbestyrelsemut minnerunngitsumillu innuttaasunut utoqqatsertariaqarput, Edvard I Kristiansen oqarpoq.
Qaasuitsup Kommuniani borgmesteri, Jess Svane, KNR-imut oqareerpoq, sulinngiffeqareerluni utereersimaleruni kommunalbestyrelsi ataatsimiigiaqqussallugu.
