Qaasuitsup Kommunia sinneqartoorluarpoq

Qaasuitsup Kommuniani kommunalbestyrelsemi ilaasortat anersaarulussinnaanngorput ippassaq saqqummiunneqarmat 2010-mut naatsorsuutit malillugit kommuuni 46,2 millioner koruuninik sinneqartoortoq.

Aningaasaqarnerup sukannersumik aqunneqarnera aammalu sipaarutissatut pilersaarutit aningaasaqarnermut ataatsimiititaliami isumaqatigiissutaasut malinneqarnerat kommuunip aningaasaqarnerata pitsanngoriarneranut pissutaavoq. Tamanna kommunalbestyrelsemi partiit tamarmik tusaatissatut tiguaat.

- Sipaarutissatut pilersaarutit malissimavagut naak isumaginninnermut aningaasartuutit 2010-mut missigersuutinit 35 millioner koruuninik amerlanerusimagaluartut, Palle Jeremiassen Siumut sinnerlugu kommunabestyrelsemut ilaasortaq oqarpoq.

Inuit Ataqatigiit, Atassut, Kattusseqatigiit Partiiat aamma Demokraatit angusaq naammagisimaarpaat. Kommuunip sanaartugassanut pilersaarutaani 32,5 millioninik atuisoqartussaasimagaluartoq taamaattoq 9,5 millioner koruunit atorneqanngitsoorsimapput.

- Uggornarpoq 11 millioner koruunit nalinganut sanaartugassat 2011-mut kinguartinneqarsimammata. Suliffissaaleqinerup nalaaniippugut taamaattumik uggornarpoq aningaasat atunngitsuukkat naatsorsuutinut kusassaataammata, Bent P. Kristiansen Inuit Ataqatigiit sinnerlugit kommunalbestyrelsemi ilaasortaq oqarpoq.

Kommunalbestyrelsip isumaqatigiissutigaa sukannersumik aningaasatigut aqutsineq 2011-mi ingerlaqqissasoq.