Qaasuitsup Kommunia nakkutigisaajunnaarpoq

Qaasuitsup Kommunia nakkutigisaajunnaarpoq. Taama Namminersorlutik Oqartussat tusagassiuutinut nalunaarummi allaaserisasqarput.

Allattoq Bibi Nathansen

juulip 08-at 2016 07:47

Qaasuitsup Kommuniata aningaasaqarnera ilimagisamit pitsaaneruvoq, taamaattumik Qaasuitsup Kommunia Namminersorlutillu Oqartussat kommunip nakkutigisaanera juunip ulluisa 24-anniit 2016 atorunnaassasoq isumaqatigiissutigaat.
- Piffissami aningaasaliinissat annertuut kommunimi pisariaqartinneranni, nuannaarutigalugu oqaatigissavara kommuni Namminersorlutik Oqartussanit nakkutigineqarunnaarmat. Tamatumunnga pissutaavoq, sukangasuumik aningaasanik aqutsinikkut, tulluarsaanikkut kiisalu isertitat annertusinerisigut kommunip aningaasaqarnini aqussinnaalermagu, Qaasuitsup Kommuniani borgmesteri, Ole Dorph taama oqarpoq.

Aamma atuaruk Qaasuitsup Kommunia sukannersumik nakkutigisaalerpoq

Aningaasaqarnermuttaaq Naalakkersuisup avannaani kommunip nakkutigineqarunnaarnera nuannaarutigaa.
- Ukiualunnguit qaangiupput kommunit pingasut nakkutigisaammata. Maannakkut nakkutigisaasoqanngilaq. Tamatuma takutippaa nakkutiginnineq iluaqutaasoq. Tamannalu ineriartorneruvoq pitsaasoq. Qaasuitsup Kommuniata immikkoortunut arlalinnut aggorneqarsinnaaneranut atatillugu, nuannaarutigaara, kommunip aningaasaqarnera qajannaatsutut isikkoqarmat, Randi Vestergaard Evaldsen oqarpoq.

Aamma atuaruk Qaasuitsup Kommunia sinneqartooruteqarluarpoq