Qaasuitsumi atorfiit inuttalerneqarsimanngitsut atorunnaassapput

Atorfinnut inuttassarsiuunneqartarsimagaluartunut aningaasaliissutaasussaagaluartut katillugit 5,3 millionit koruunit siunertanut allanut atorneqarnissaat naatsorsuutigineqarpoq:

- Aningaasat atorfinnit inuttaligassaangaluanit allanut atorneqarnissaat ima paasineqassanngilaq sulisunik ilanngartuiniartugut, kisianni aningaasat taakkua illuartittagaraluagut allamut sangutikkiartuaarnissaat naatsorsuutigivarput, Jess Svane Qaasuitsup Kommuniani borgmesteri oqarpoq.

Atorfiit inuttassarsiortaraluarlugit inuttalerneqarneq ajortut peerneqarnissaat inuttaasut sullinneqarnerannut appariaateqassanngitsoq Jess Svanep naqissuserpaa:

- Appariaateqartoqassanngilaq, akisussaaffiup oqartussaaffinnut assigiinngitsunut siammarterneratigut sullissinerup pitsaanerulernissaa anguniarneqassasoq Aningaasaqarnermut ataatsimiititaliaq isumaqarpoq, Jess Svane oqarpoq.

Aningaasat atorfinnut inuttalerneqarsimanngitsunut immikkoortitaagaluit siunertanut allanut atorneqarnissaannut innersuussuteqarneq Qaasuitsup Kommuniani allattoqarfiup misissuisitsisimaneranik aallaaveqarpoq:

- Taamaalillutalu aamma sulisut ilannganngikkaluarlugit oqartussaaffiup Ilulissanut katikkiartuaarsimasup siammarnissaa  angusinnaavarput, Jess Svane oqarpoq.

Qaasuitsup Kommuniani Allattoqarfiup misissuisitsimanera kommunalbestyrelsimut suli saqqummiunneqarsimanngilaq.Taamaattumik atorfiit sorpiaat peerniarneqarnersut  suli saqqummiunneqanngilaq.