Qaasuitsumi arfanniarnermut ileqqoreqqusaliulerput

Ileqqoreqqusassap suliarinerani aalisartut, piniartut takornariaqarnermillu suliaqartut tusarniarneqassapput.

- Taamaammat ileqqoreqqusap aggustip ulluisa 13-anni qipoqqarniarnerup aallartiffiani naammassineqarnissaa ilimagineqanngilaq, borgmester Jess Svane oqarpoq, nangillunilu:

- Ileqqoreqqusap suliarineqarnissaa nukinginnarsivoq, aammalu qipoqqartassinneqarneq nuannaarutigineqarpoq, qipoqqaat amerlanerujussuat ajornartorsiutitut isigineqarmata, Jess Svane oqarpoq.

Pisuusssutit uumassusillit pillugit ataatsmiititaliaq ileqqoreqqussaq pillugu sapaatip akunnerata tulliani ataatsimiissasoq Jess Svane neriorsuivoq.

Arfanniarneq arfernillu takornariartitsisarnerup ileqqoreqqusaliarineqarnissaa ilungersunassasoq sivisuumillu suliarineqasasoq Jess Svanep naatsorsuutigaa.

- Piniakkat pillugit avataaniit annertuumik tatineqarpugut, uumasut oqimaaqatigiinngitsumik inissikkiartornerat akueriuminaatsutut isigineqarpoq, taamaattumik piniartut tusarniarneqarnissaat pingaaruteqarpoq kommunitsinnilu takorniarianik suliaqartut tusarniarneqarnissaat aamma pingaaruteqarpoq, Jess Svane oqarpoq.

Nunat tamat arfanniarneq pillugu ataatsimiititaliarsuata Kalaallit Nunaat qulingiluanik qipoqqartassinneqarnisaa juunip 25-ani akuersissutigaa.

Arfattassiissutit kommuninut juulip 16-ani agguaanneqarput, kommuneni sulisut amerlanerit sulinngiffeqaleruttorneranni.

Taamaammat qipporniarneq aggustip ulluisa 13-anni aallartittussaq sioqqullugu arfanniarneq pillugu ileqqoreqqusaliortoqarnissaq borgmesterip qularutigaa.

- Piffissaq sivikitsoq atorlugu tusarniaasussaavugut, aalisartut piniartut aammalu takornarianik suliaqartut tusarniarneqartussaammata, Jess Svane oqarpoq, nangillunilu:

- Arfanniarneq arfernillu takornariartitsisarnerup ileqqoreqqusaliornissaanut piffissap sivikinnera uggornarpoq.