Qaartuujasut pillugit nalunaarut nutaaq

Akoorutissat qaartuujasut pillugit pissutsit sakkortunerulersimanerisa malitsigisaanik, akoorutissanik qaartuujasunik aqutsineq pillugu nalunaarut nutaaq, septembarip ulluisa aallaqqaataanni atuutilersussanngorpoq.

Naalakkersuisunut ilaasortaq, Jørgen Wæver Johansen, tassunga atatillugu oqarpoq, suliassaqarfimmi maannamut malittarisassani itisiliinissaq amigaataasimasoq, taamaattumillu nunarput akuersaarnanngitsumik inissinneqartoq.

-Nalunaarutip atuutilernerata kingunerisaanik, nunani allani Kalaallit Nunaata imminut sanilliuttagaanni, inatsisinut, suliassaqarfimmut malittarisassiuussineq nallersuunneqarsinnaalissaaq, Jørgen Wæver Johansen oqarpoq.

Taamaattumik akoorutissanik qaartuujasunik Kalaallit Nunaanniit Danmarkimut, immaqalu aamma tassanngaanniit Europamut, nunarsuulluunniit sinneranut, ingerlatitseqqittoqartannginnissaa aalajangiisuulluinnarpoq.

Nalunaarummi eqqarsaatigineqartup pingaarnerup aappaa tassaavoq, ataatsimut isigalugu innuttaasunut isumannaallisaanerup qaffasinnerulernissaa.

Nunatsinni ineriartorneq pitsaasoq illoqarfiit arlaqartut pitsaasumik alliartornerannik kinguneqartoq pissutaalluni, sanaartorfiusut suli annertusiartorput. Tamatuma nassatarisaanik qaartartuusiviit pioreersut eqqarsaatigineqanngitsumik inuinnarnut, taakkulu inigisaannut aarlerinartumik qanillingaatsiarsimapput. Ajutoorneq inuiaqatigiinni nalinginnaasuni najugaqartunullu qaninnerpaanut kingunerluuteqarujussuarsinnaavoq.