Qaartoornerup kingorna Rigshospitaliliaanneqarpoq
Kangersuatsiami angut 49-nik ukiulik nappartap qaartoornerata kingorna uutiterujussuarpoq.
Allattoq Medea Frederiksen
Tallimanngormat Kangersuatsiami sulinerup nalaani ajutoornermut tunngasumik nalunaarutiginnittoqarpoq. Upernavimmi politiit KNR-imut taama nalunaarput.
Angut 49-nik ukiulik pingasunngornermi sulitilluni nappartap qaarnerata kingorna nissumigut illuttut uutiterujussuarsimavoq. Angutip uutiterneri annertummata Rigshospitaliliaanneqarsimavoq.
Suna qaartoornermut pissutaanersoq suli paasineqanngilaq, politiilli nappartaq orsussamik imaqarsimassasoq ilimagaat.
Suliaq suli politiinit misissorneqarpoq.