Qaartitsineq suli akisussaaffigineqarumanngilaq

Pakistanimi ippassaq danskit aallartitaqarfiata eqqaani qaartitsisoqarnera suli arlaannaannilluunniit akisussaaffigineqarumanngilaq, Talibanimiulli pasineqarnerpaasut, nutaarsiassaqartitsiviup ritzau-ip allaaseraa.
Allattoq Louise M. Kleemann
juunip 03-at 2008 07:53

Qaartartumeerineq minnerpaamik inuit arfinillit – arfineq-pingasooratarsinnaasulli inuunerannik naleqarpoq 35-illu ikiligaallutik. Toqutaasunut ilaavoq utoqqasaaq danskisut innuttaassusilik pakistanimiunilli aallaaveqartuusoq.

Danmarkimi nunanut allanut ministeeriaqarfik kiisalu Danmarkimi Naalagaaffiup isertortumik paasiniaasartuisa PET-ikkut immikkut ilisimasalittaat ippassaq unnukkut Pakistan-imut aallartinneqarput. Taakku Pakistanimiunik peqateqassallutik immikkut ittumik paasiniaajartortinneqarput.

Maannakkuugallartoq paasisat naapertorlugit biili qaartartumeerissutaasoq ilumuunngitsumik normu plade-lik qaartartumik 25 kilomik useqarsimavoq, aallartitaqarfimmullu qanittuararsuarmi qaarsimalluni.

Talebanimiut qaartitsisuusimasutut pasineqarnerannut tunngavigineqarpoq, taakku qaartartumik taama ittumik atuigajuttarsimammata.

Pakistanimi nunap iluani pissutsinut ministeriaqarfimmi pisortaasup ilimagaa, immikkut ittumik paasiniaasoqatigiit ullup ingerlanerani paasissutissanik nutaanik paasisaqarsinnaassasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq