Qaartiterutissat sullivimmi nassaarineqartut
Nuummi sanaartorfiit ilaanni qaartiterutissanik maaniinnarmiittunik nassaartoqarpoq. Qaartiterutissat ulamertut qaartitsilernermi assersuutigineqartartut ataannut inissinneqarsimapput. Politiit nassaartoqarneranik nalunaarfigineqarnermik kingorna paasiniaanertik aallartippaat, taamaattumillu annerusumik maannamut paasissutissiisinnaanatik.
Qaartiterutissanik qanoq amerlatigisunik nassaartoqarsimanersoq, politiit paasiniaanertik pissutigalugu oqaatigisinnaanngilaat, soorlu aamma sumerpiaq nassaarineqarsimanersut oqaatigerusunngikkaat.
Suliamut atatillugu suli killisiuisoqanngilaq tigusarinnittoqaranilu.
Qaartiterutissat nassaarineqartut taamaatsillutik uloriananngitsut, politiit oqaatigaat. Aatsaammi ikittaatit immikkut ittut atorlugit qaartinneqarsinnaapput. Qaartiterutissalli maaniinnarmiitinnissaat qaartiterutissanut tunngasunut inatsimmik sukannersorujussuusumik unioqqutitsineruvoq. Taama unioqqutitsineq akiliisitaanermik imaluunniit qaartiterisinnaanermut akuersissummik arsaarneqarnermik kinguneqarsinnaavoq.