Qaartartunut illersuutit isorineqarput
Russit præsidentertaavat Dmitrij Medvedev siullerpaamik nunanut allanut angalaqqammerpoq, ullumilu Kinap illoqarfiisa pingaarnersaat Beijing aqqusaaramiuk, Kina-p præsidentia Hu Jintao oqaloqatigaa.
- Taakku marluullutik isumaqarput nunarsuarmi qaartartunut illersuuteqarneq nunarsuup pissutsitigut oqimaaqatigiissarneranut iluaqutaanavianngitsoq aammalu nunat tamat siunnerfiinut sakkullu siammariartornerinut aammalu aqunneqarnerinut asuli ajoqutaaginnassasut, taama politikkerit nunamik aqutsisut marluk ataatsimoorussaminnik isumaqatigiissuteqarput.
Taakku isornartorsiuinerannut Kalaallit Nunaanni Pituffimmiittoq qaartartunut illersuut aamma pineqarpoq
Russit nunanut allanut ministeriat Sergej Lavrov issittoq pillugu ataatsimeersuarnermut atatillugu peqataajartorluni marlunngorpat Ilulissanut tikittussaavoq. Taamanikkussamullu takujumaarparput qaartartunut igeriuttakkanut illersuuteqarneq pillugu russit præsidentiata isornartorsiuinerata assinganik Kalaallit Nunaanni naalakkersuisunut isornartorsiuiumaassanersoq.
