Qaartartumeerisoq kinaassusersineqarpoq

B.T.-mi allaaserineqarpoq, Københavnimi sapaatip akunnerani kingullermi akunnittarfimmi qaartartumeerisoq tassaassasoq 24-nik ukiulik Tjetjeniamiu Lors Doukaiev. Paasissutissat aviisip saqqummiussai politiinit uppernarsarneqarput.
Allattoq Elisa Isaksen
septembarip 15-at 2010 07:26

Qaartartumeerisup Belgiami tilluunnermut sungiusaasua, aviisip B.T.-p nassaaraa, taassumami angut pineqartoq ilisarisinnaavaa.

- Tigummigallarneqartoq qularutissaanngitsumik Lors Doukaiev-iussasoq uppernarsarsinnaavarput. Taanna Tjetjeniamiuuvoq 24-nik ukiulik ukiunilu tallimani Belgiami najugaqarluni. Tamanna qularnaarlugu oqaatigisinnaanngilarput, tassami Belgiamiut politiivisa kinaanera DNA atorlugu uppernarsarsinnaanngimmassuk, taamaattorli Lors Doukaiev-iunini miserratiginngilaa, Københavnimi politiineersoq Svend Foldager ullaap tungaa tusagassiortunik katersortitsinermi oqarpoq.

Qaartartumeerisoq kisimiilluni ajortumeeriniartuunersoq imaluunniit allanik suleqateqarnersoq, politiinit, Belgiamiut politiivi aamma Europol suleqatigalugit misissoqqissaarneqassaaq.

Qaartartumeerisoq oktobarip sisamaata tungaanut tigummigallarneqarallarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq