Qaartartorsuit ikilisarnissaat pillugu isumaqatigiissutissaq piareerneqarpoq

Illuatungeriit qaartartorsuit pigisatik sisamararterummik ikilisissagaat isumaqatigiissutip kingunerissagaa amerikami tusagassiorfiit arlaqartut nalunaarutigaat.

USA-mi præsidentip illorsuata oqaatigaa, isumaqatigiissut pingaartinnartuusoq.

START-imik taallugu isumaqatigiissut 1991-imeersoq, nunat pissaanilissuit akornanni sakkussiarsuit ikilisaanissamik isumaqatigiissutip aallarniutigisaa, isumaqatigiissutip taarsissavaa. Isumaqatigiissut atuunnikuusoq decembarimi atuukkunnaarpoq, taamanerniillu illuatungeriit isumaqatigiissummut taarsiussassaq isumaqatiginninniutigaat.

- Isumaqatigiissutip pingaartinnartup taassuma naalagaaffiit marluusut sillimaniarnikkut toqqissisimanarnerulersissavai, taamatullu naqissusissallugu USA aamma Rusland qaartartorsuit sillimaffiginiarneqarneranni nunarsuarmilu siammarterneqannginnissaanni siuttuusut, præsidentip illorsuanit tusagassiorfinnut nalunaarummi taama malunaaruteqartoqarpoq.

USA-p Ruslandillu akornanni START-imik taallugu isumaqatigiissutip nutaap taassuma, qaartartorsuit igeriunneqarsinnaasut amerlassusaat 1550-inut killiliiffigaa.

Tamatuma saniatigut qaartartut akunnattumik ungasissusilimmut igeriunneqarsinnaasut 800-nut killilerneqarput.