Qaartartoq Pituffimmiittoq ulorianaateqanngilaq
Risø-mi qinngornerit pillugit ilisimatusarfimmi sulisoq avatangiisillu pillugit qinngornernik misissuisoq Sven Nielsen, isumaqarpoq qaartartoq Pituffiup avatangiisaanut ulorianaateqanngitsoq:
-Naamik ulorianartoqarnissaa ilimaginngilara.
Ukiut 40-t matuma siornali, timmisartorsuup nakkarnerata kingorna Risømit ukiut tallimakkaarlugit avatangiisit mingutsinneqarsinnaanerannik misissuinerit ingerlanneqartarput. Timmisartorsuullu nakkarfiata nalaani immami, uumasunilu mingutsitsineq annikingaarmat, tamanna inunnut ajoqutaanngitsoq oqaatigisinnaavara, Sven Nielsen nassuiaavoq.
- Soorunami paasisinnaalluarpakka, aamma uanga qanittumiikkaluaruma ernumagissangaluarpara, peerneqarnissaalu kissaatigissangaluarlugu. Kisiannili avatangiisit misissuiffigisarneranni mingutsitsineq avatangiisinut uumasunut inuillu peqqissusaannut sunniuteqarsinnaaneranik takussutissaqanngimmat, annerusumik qisuariaateqartoqartariaqanngitsoq isumaqarpunga, Sven Nielsen oqarpoq.
-Aah!, tamanna qanoq akissallugu nalunarpoq. Soorunami nuannernavianngilaq, pissusissamisuussaarlu peerneqarnissaa. Kisiannili misissuinerit takutippassuk mingutsitsineq inunnut uumasunullu ajoqutaanngitsoq, taava isumaqarpunga tamanna eqqissilluni tigusariaqartoq, Risømi qinngornerit pillugit ilisimatusarfimmi sulisoq Sven Nielsen naggasiilluni taama oqarpoq.
