Qaannamik qimaasoq nassaarineqarpoq

Angut qallunaaq 39-nik ukiulik Aalborgimi Tarnimikkut nappaatillit napparsimmavianniit qimaasoq, eqqumiilluinnaqqissaartumik ippassaq nassaarineqarpoq - tassami Sjællandip avannaatungaata sineriaani sissamiit 1000 meterimik ungasitsigisumi qaannamiittoq nassaarineqarpoq.
marsip 23-at 2010 06:46

- Anguuteqarpasigani assaannarminik anguarpoq. Annaanneqarnini assut naammagittaalliutigaa, Jyllandip Avannaani Politeeqarfimmi pigaartoq oqarpoq.

Angut arfininngormalli ujaarineqalerpoq, Sjællandimullu qimaanissaa politiit ilimagereersimavaat, taamaattorli qaannamik qimaanissaa ilimaginngilluinnaqqissaarsimallugu.

- Aalborgimiit Helsingørip tungaanut qajartorsimanissaa qularaara. Taamaalluarsimasinnaavorli, politeeq oqarpoq.

Sakkutuut Imarsiortut Qullersaqarfiat ippassaq unnulaannguaq arfineq-marlup missaani kalerrinneqarpoq, angut Helsingørip avannaatungaata avataani kaajalukaarluni anguartoq takuneqarsimasoq, nalunaaquttallu akunnera qaangiummat angut tigusarineqarpoq.

Qajaq angutip nammineq piginerarpaa, oqaatigerusunngilaali Aalborgimiit Helsingørip tungaanut anguarsimanerluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq