Nuna tamakkerlugu qaannamik pissartanngorniunnerit Ilulissani ingerlanneqartut katersortarfimmi unnugu naggaserneqassapput, naggataarnersiornermilu ilaatigut qajartullammammik toqqaasoqassaaq pokalinillu ingerlaartunik tunniussisoqassalluni.
Ilulissani Qaannat Peqatigiiffianni siulittaasoq Abel Jakobsen pissartanngorniunnermik naliliisipparput, imalu oqarpoq:
- Pissartanngorniunneq aallartinneranit naaneranut ajunngitsumik nalilersinnaavara, parruffinnik allannguilaartarsimagaluarluta. Unamminerit tamarmik ajunngitsumik naammassineqartarput. Ullut taakku nuanneqaat aamma isiginnaariat nuannertaramik, ulloq sivikinaarnartarpoq. Abel Jakobsen oqarpoq.
Aamma oqarpoq, ullut siulliit eqqarsaatigalugit anorlilaartarsimasoq – parruttunut ilaatigut akornutaalaartarsimagaluartumik, aappaatigulli sikumik avalassimaartitsisarmat ippernallu takussaavallaannginnerannik kinguneqartitsisarmat qujanaannartarsimanerarpaa.
- Parrunnermi taasaqassaguma, Elias Inuusuttoq Sisimiuneersoq immikkut taasinnaavara. Taanna ajugaallattaagami. Ukiut siuliini allat ajugaasaraluartut taamaalillutik allannguuteqalaarput. Abel Jakobsen nassuiaavoq.
Qaannamik pissartanngorniunnernut peqataasut Qaqortumit, Paamiunit, Nuummit, Sisimiunit, Maniitsumit, Ilulissanit Qaarsuniillu katillugit 80-it missaanniipput. Unammeqataasut pissartanngorniunnermullu ikiuuttut unnugu naggataarnersioqatigiissapput nerersuaqatigiinnertalimmik. Tulliani qaannamik pissartanngorniunneq Qaqortumi aappaagu ingerlanneqassaaq.