Qaannamik pissartanngorniunnerit marlunngornermi aallartissapput
Qaannamik unammersuarnerit Nuummi marlunngornermi juulip ulluisa aqqaneq-aappaanni aallartissapput.
Meeqqaniit utoqqarnut qajartortartut 110-t Ilulissaniit, Sisimiuniit, Nuummiit kiisalu Qaqortumiit peqataassapput.
Unammersuarnerit Nuummi Nuutoqqap avataani pissapput. Aaqqissuisullu isumalluarput.
- Silageriarpat unammersuarnerit nuannersumik ingerlassapput. Aammami piareersarluarnikooqaagut, Nuummi qajartortartut peqatigiiffianni siulittaasoq Pavia Tobiassen oqarpoq.
Peqataasut ukiui naapertorlugit eqimattakkuutaarlugit immikkoortinneqarsimapput. Peqataasuni ukiukinnerpaat sisamanik ukioqarput ukioqqortunerpaallu 60-it sinnerlugit ukioqarlutik.
Marlunngornermi naatsumik parrulluni sukkaniuunnerit pissapput. Pingasunngornermi ullaap tungaa kinngusaqattaarnerit aallartissapput. Ullullu ingerlanerani saaqqusersornerit unammissutigineqassallutik.
Sisamanngornermi isorartuumik parruttoqassaaq. Tassani 16 kilometerisut isorartutigisumik parrulluni sukkaniuuttoqassalluni.
Ataasiakkaarluni tallimanngornermi kinngusaqattaartoqassaaq. Allunaariaqattaarnerit arfininngornermi pissapput. Maqittarlugulu sapaammi parruttoqassalluni. Unammersuarnerillu iligiikkaarluni parrunnermik ataasinngornermi naggaserneqassallutik, tamannalu arnamik angumillu qajartullaqqinnerpaanik toqqaanermik malitseqassalluni.
Qaannamik pissartanngorniunnerit juulip ulluisa aqqaneq-aappaanniit 18-iat ilanngullugu KNR-TV-kkut toqqaannartumik ullut tamaasa nal. 09:30-niit – 11:30-nut aamma 13:00-miit – 17:00 tungaanut aallakaatinneqartassapput.
Aamma KNR-radiukkut marlunngornermiit tallimanngorneq ilanngullugu nal. 10.07-miit 12.00 tungaanut toqqaannartumik aallakaatitsisoqartassaaq. Kiisalu ataasinngornermi juulip ulluisa 18-anni nal. 15.00 –miit 16.30 tungaanut aalakaatitsisoqassalluni.
