Nuna tamakkerlugu qaannamik pissartanngorniunnerit Ilulissani pisortatigoortumik ulloqeqqata siorna aallartipput.
Ullumikkut unammissutigineqartussat tassaapput: naatsumik parrunneq saaqqusersornerlu, ulloqeqqata siorna meeqqat unammipput ualerulu nalunaaqutaq ataatsimit inersimasut unammissapput.
Ullut tulliuttut assigiinngitsunik imaqassapput, parruffiussallutik.
Qaqortumit, Paamiunit, Nuummit, Maniitsumit, Sisimiunit, Ilulissanit Qaarsuniillu unammersuarnernut peqataasoqarpoq, peqataasut katillugit 80-it missaanniipput. Ukiukinnerpaaq tallimanik ukioqarpoq, ukioqqortunerpaarlu 63-inik ukioqarluni.
Ataasinngormat kingullermik pisortatiguunngitsumik unammisoqarpoq, 90 kilometerinik parruttoqarmat.
Tassani Ilulissanit aallariarlutik, Oqaatsut, Ilimanaq Qasigiannguillu aqqusaariarlugit Ilulissanut uterput, sisamanngormallu tikillutik.
Unamminermi tassani inuit 18-it peqataapput, arfineq-pingasullu 90 kilometeri tamakkerlugu naammassivaat. Unamminermi tassani Sisimiuninngaanneersoq Maligiaq Padilla ajugaavoq.
Qaannamik unammersuarnerit arfininngorpat naggaserlugit medaljennatsitsisoqassaaq.