Qaanaarmiut 19:00 ataatsimiigiaqquneqarput
Qaanaami innuttaasut unnugu nalunaaqutaq arfineq marluniit ataatsimiisinneqassapput, Qaanaaq pillugu komitemik pilersitsineq Qaanaamilu imigassap ammaqqinnissaanut siunnersuutit pingasut taasisitsissutigineqarnissaat sammineqassapput. Imigassamut point-it atorneqaqqilersinnaanerat imaluunniit immiaaqqat viinnillu kisimik tunisaalersinnaanerat imaluunniit killeqanngitsumik tuniniaasoqaqqilissanersoq Qaanaarmiunut ataasinngorpat taasisitsissutigineqassaaq.
- Ataatsimiisitsinermi saqqummiutissavagut Namminersornerullutik Oqartussat Qaanaallu kommuneata pilersitaata komitép suliniutissai, tassungalu ilanngullugu imigassamik ammaaqqinnissamut qanoq ililluta aaqqeeqataaniarnissarput.
Imigassamik matusinermut qaanaarmiut akerliujuaannarsimapput.
- Matusisoqarmat kommunalbestyrelse akerliulluni oqariartuuteqarpoq, sulilu tamanna aalajangiusimavarput. Paasitinneqaqqaarata qulitsinniit aalajangiisoqarnikuummat akerliunerput suli attapparput.
- Imigassamik qanoq ililluni ammaanissamut siunnersuut kommunalbestyrelsemi ippassaq eqqartorneqarmat kommunalbestyrelse aalajangerpoq siunnersuut innuttaasunut saqqummiuteqqaarneqassasoq, Naalakkersuisunut saqqummiunneqartinnani. Uaguinnaq aalajngiiumannginnatta innuttaasut isumaat paaseqqaarumavarput. Jens Danielsen oqarpoq.
Qaanaamit aallartitat Naalakkersuisullu sapaatip akunnerani kingullermi ataatsimiimmata Qaanaami imigassamik ammaanissaq aamma eqqartorneqarsimavoq.
-Isummatsinnik saqummiussigatta periarfissat eqqartorneqartut tassaapput pointilersueqqilersinnaaneq imaluunnit Illoqqortoormiuni iliornertut, tassa viinniinnarnik immiaaraannarnillu tuniniaaneq. Uagulli piumasaqaatigaarput nunatta sinneranitulli ingerlatsiviunissarput.
Jens Danielsen oqarpoq, Qaanaami innuttaasut apereqqaarnagit naalakkersuisut imigassamik matusinerat akueriuminaatsinneqartoq. Innuttaasut ataasinngorpat ullaakkut quliniit ualikkut tallimat tungaanut kommunep allaffiani taasitinneqassapput, taasisitsinermilu inernerit naalakkersuisunut marlunngorpat saqqummiunneqassapput.
