Qaanaarmiup qitilulersorigaluariarluni paasilerpaa nuna sajuttoq
Qaanaami innuttaasut ippassaq nuna sajummat malussarput. Qaanaaq sajuffiup aallarnerfianit 195 kilometerisut ungasitsigisumiikkaluarluartoq sajunneq nunap sajuttarneranut uuttuut naapertorlugu 6,1-imik sakkortussuseqartoq Qaanaarmiunit malugineqarpoq.
Allattoq Mads Lynge
juulip 08-at 2009 17:10
- Sajunnerup kinguninngua inuit Kap York Radiomut siarngupput, Moses Duneq malussartut ilaat oqarpoq.
Taanna angerlarsimalluni ippassaq ualilluinnaraa sofami nalaasaarpoq fjernsyni isiginnaajutigalugu. Qitermigut tassanngaannaq ippigusulerpoq, qiterluttaramilu eqqarsaqqaaraluarpoq anniarnerluni.
Paasileramiulli nuna sajuttoq nikuippoq silammullu itsuartorluni. Malunnarsinnaasumilli takusaqanngilaq.
Kinguninngua Qaanaami siarnguttoqalerpoq, Qaanaami Kap York Radiomi eqqartuisoqalerluni. Illoqarfimmiit nunaqarfinniillu sianertoqarluni.
