Qaanaaq komité pilersinneqarpoq

Ataatsimiititaliaq nutaaq taanna Qaanaami borgmesteri, Qaannaap Kommunalbestyrelseani ataatsimiititaliani siulittaasunit, atuarfiup pisortaanik, politimesterimik pisortaqarfiillu aallartitaannit ilaasortaqassaaq. Ataatsimiititaliap ataatsimiinnera siulleq ippassaq pisoq pillugu Qaanaami borgmesteri Jens Danielsen, angerlamut ingeerlaarluni maanna Kangerlussuarmiittoq ima oqarpoq:

- Suliassat taakkua tulleriissaarinerat ingerlanniarsarivagut suleqatigiissitaliaminngaanniit. Ullumikkut suna siulliutissanersoq allallu, kisianni tassa siulliusussatut eqqarsaatigaarput tarnip pissusaanik ilisimasalimmik taavunga Qaanaamut pisoqarnissaa. Taamaattumik Namminersornerullutik Oqartussat kalaallisut oqaasilimmik pissarsiorput, borgmesteri oqaluttuarpoq, nangillunilu:

- Soorunami suliffissaqartitsiniarnermut tunngasut ilanngullugit aamma sammivagut, ksianni uagut kommunitsinni ingeniørimik atorfeqartitsinnginnatta nalilersuisinnaanngilagut. Taamaattumik Namminersornerullutik Oqartussanut ikiuisinnaasumik qinnuteqarpugut.

-Suliniutissatullu tullertut aamma taasinnaavagut inuussutissarsiutinut, suliffissaqartitsiniarnermut assigiinngitsullu tulleriisaarneqarnissaat. Allaganngorlugit takussutissianngorunik sorliit siulliunneqassanersut paasinarsissaaq, tamannalu nalunarunnassaaq juunip aqqarnani suliniutissat saqqummiunneqarpata tulleriissaarlugit.

Qaanaap borgmesteria Jens Danielsen taama oqarpoq.

Namminersornerullutik Oqartussat ataatsimiissimaneq pillugu nalunaarumminni tarnip pissusaanik ilisimasalimmik juunip 20-aniit 30-anut Qaanaamiittoqassasoq oqaatigaat. Taassuma saniatigut qassit ilaqutariit højskolertinneqarnissaanut peqataassanersut misissorneqassaaq.