Qaanaaq Ilulissanut ernutaajumanngilaq

Avannaani kommunit kattunnerisa kingorna, Ilulissat avannaani kommuninut piitsuunerusunut aataaqarfiullunilu aannaaqarfiunissaa, Uusaqqaq Qujaukitsup Qaanaameersup eqqarsarianartippaa.

Oqariaatsit pineqartut atorneqarput Ilulissani qinersisartunik marlunngormat ataatsimiititsinermi, Kattusseqatigiit Partiiata qinigassanngortitaasa ilaannit Kaaleeraq Frederiksenimit.

Tassalu tamanna Uusaqqaq Qujaukitsup eqqarsariarnartoqartippaa:

- Ilulissat aataatut aanaatullu taaneqassappat uagullu maaniittugut ernutanngorluta, tamanna eqqarsariarnarpoq.

Aamma isumaqarpoq kommunersuanngornerup kingorna kommunalbestyrelsimut ilaasortanngortussat attaviginiarneri oqaloqatiginiarnerilu ajornarnerulissasoq:

- Immaqa ullut arlallit ila immaqa sapaatit akunneri arlallit sioqqutsilluta piffissami piniaqqaartariaqartalissaagut.

Qaanaameersunik isertoqanngippat kipiluttunartuussasoq aamma isumaqarpoq.

Ilulissat avannaani illoqarfiit annersaralugulu inuttunissarimmagu pissusissamisuuginnannginerlunimi illoqarfittut pingaarninngorpat:

- Siunissami sungiukkumaarunnarsivarput. Kisianni tassa Qaanaameersunik isertoqanngippat, Qaanaarmiunut nuannernavianngitsoq, oqarpoq Uusaqqaq Qujaukitsoq.