Qaanaap eqqaani timmisartup nakkarsimanera pillugu siuttut ataatsimeeqatigiipput

Timmisartorsuaq B-52-i qaartartunik useqarluni 1968-imi Qaanaap eqqaani nakkarnerata kingorna, nakkarfiup nalaani saliillutik sulisuusimasut allanut naleqqiullutik napparsimanerunngitsut, Danmarkimi Kræftens Bekæmpelse-p ullumikkut nalunaarutigaa.

Taamatut tusagassiutinut nalunaaruteqartoqarnerata kingunerisaanik, Naalakkersuisut siulittaasuat Hans Enoksen, Danmarkimi statsiministeri Anders

Fogh Rasmussen ullumikkut ataatsimeeqatigaa.

Ataatsimiinneq qanoq inerneqarsimanersoq paasiniaraluaratsigu, Hans Enoksen pissarsiarisinnaasimanngilarput.

Qaanaap eqqaani timmisartorsuup 1968-imi nakkarnerata kingorna Thule-p eqqaani saliillutik sulisuusimasut isumaqarput, kræfti akiorniarlugu suliniaqatigiiffiup misissuititsisimanerani kisitsisit atorneqartut tutsuiginanngitsut.

Ilisimatusarfik Risø-miittoq oktoberip qaammataani nalunaarpoq, Qaanaap eqqaani Narsaarsummi nuna imarlu plutoniumimik mingutsinneqarsimasoq, taamaammat nunatsinni naalakkersuisut piumasaqarput timmisartorsuup nakkarfiata nalaani sulisuusimasut Qaanaallu eqqaani najugaqartut peqqissusaat misissuiffigilluarneqartariaqartut.

Danskit naalagaaffiat Pituffimmi sulisartunut tamanut 1995-imi 50.000 koruuninik taarsiissuteqarpoq