Qaanaap avannaaniit Sikuiuitsumut Kujallermut angalaniarput
Tuluit nukappissat marluk 20-nik ukiullit nunarsuup kissakkiartornerata inuusuttoqatiminnit ilisimaneqarnerulernissaa anguniarlugu angalaniarnerat arfininngormat ajutoorluinnangajappoq. Tassa Thuletoqqamiit Kullorsuup tungaanut ingerlaartillutik Qimusseriarsuarmiitillutik inuusuttup aappaa sikukkut nakkaraluarmat.
Tuluit inuusuttut taakku marluk aalajangersimapput Qaanaap avannaaniit Sikuiuitsumut Kujallermut angalaniarlutik, kisianni aallalaaginnarlutik nunarsuup kissakkiartornera timimikkut malugilluarpaat.
Inuusuttut taakkua marluk piniartunik marlunnik Savissivimmiunik angallassisoqarlutik qimussimik ingerlaaleruttorlutik 20-nik ukiullip Rob Gauntletip aaqqatimi illuatungaa katappaa tiguniarlugulu utimut arpalerluni. Tassanngaannarli sikukkut nakkarpoq. Minutsini pingasuni immami nilleqisumiippoq qaqinneqaramilu ilisimajunnaarsimalluni.
Kammalaataa aamma 20-nik ukiulik James Hooper oqaluttuarpoq piniartut Savissivimmiut, Peter Hansen aamma Jens Ivik immikkut ilisimasaqarluinnarnerminnik takutitsisimasut. Ingerlaannarlutik tupermik nappaasimapput, tuluullu inuusuttup atisai piiarlugit kissasserlugulu, nalunaaquttallu akunnerata affaa qaangiummat Rob Gauntlet ilisimmarsimavoq.
Peqatigisaanik kammalaataa Pituffimmut radiukkut ikiortissarsiorsimavoq, Upernavimmilu politiit qulimiguulimmik attartugassarseriarlutik tuluit inuusuttut angalatuut taakku marluk aasimavaat angullu qiuleqisoq Upernaviup napparsimmavianukaanneqarpoq maannalu isumannarunnaareerluni.
Tuluit kammalaatigiit 20-nik ukiullit Qalasersuup eqqaaniit Sikuiuitsumut Kujallermut angalanissartik siorna nunarsuarmi qaqqat portunersaat Mount Everest Nepalimiittoq qaqereerlugu isumassarsiaraat, taama James Hooper Upernavimmiit Radioaviisimut oqaluttuarpoq.
- Taamatut aalajangernitsinnut patsisaavoq inuusuttut nunarsuarmiut silaannaap kiatsikkiartornerata kingunerinik paasisaqarnissaat angorusukkatsigu tassa inuusuttut siunissaat pillugu aamma iliuuseqarnitsigut nammineerlutik iliuuseqarsinnaanerat maligassiorusukkatsigu.
Tuluit inuusuttut taakku marluk arfininngormat quarsaartitaagaluarlutik nunatsinnit Sikuiuitsumut Kujallermut angalaniarnertik ingerlateqqinniarpaat. Inuusuttut taakku marluk aallugit angallat “Ice Maiden” Sisimiuniit maanna Upernavimmut ingerlaarpoq Upernavimmillu New Yorkimut ingerlaqqinniarput.
Angalanerat nittartagaatigut malinnaaffigineqarsinnaavoq. Taannalu Radioaviisip nittartagaani knr.gl-imi nanineqarsinnaavoq.
