Qaanaap aningaasatigut inissisimanera paasissutissiissutigineqarsimanngilaq
Qaanaarmiut aningaasaqarnertik aaqqiiniaqataaffigiumavaat
Qaanaami borgmesteri tunuartoq taarserlugu borgmesterinngortoq Siumumeersoq, Jens Danielsen oqarpoq kommunep aningaasaqarnera pillugu siornagut paasissutissiisarsimanerit kommunep aningaasarliulerneranut pissutaaqataasimasut. Jens Danielsen oqarpoq, Qaanaap kommunea, naak kommuneqarfinnik Nakkutilliisoqarfimmit nakkutigisaalersimagaluarluni, nammineerluni maannamiit assigiinngitsunik iliuuseqarnissaa sulissutigissagini.
- Taamattoqarnera paasigatsigu kommunalbestyrelsemi ilungersuutigisimavarput. Siornagut kommunaldirektøriusarsimasut aningaasaqarnermullu pisortaasarsimasut kommunep aningaasaqarnera ajoqutissartaqanngitsutut takkorliuttarsimavaat, soorunalu komunalbestyrelsep aningaasaqarnermut ataatsimiititaliaa, qaammatit tamaasa taama paaissutissiisarnernut akuersisarsimavoq. Toqqortuisoqartarsimanera kingusiinnakkut paasilerparput, ukiullu uuma siuliani allamik kommunaldirektørertaaratta taassuma qanoq ingerlasoqarnera paasiartulerlugu uagutsinnut nalunaaruteqarpoq, tassanngaanniillu paasiartuleratsigu misissuititsivugut.
Qaanaap kommuneata Namminersornerullutik Oqartussanit atukkani aningaasat 7 million koruunit tamakkerlugit atornaviarunanngikkai Jens Danielsen isumaqarpoq.
- Tassunga atatillugu misissugassat ilagaat Thule Fond-ti. Thule Fondtip aningaasaqarneranut kommune akiliussigallartarsimavoq, taannalu suli misissorneqarani. Taamaasilluni aningaasat Thule Fondtimut atukkiunneqartarsimasut amerlajaartorsuit kommunemut utertinneqarnissaat siunertaralugu misissuisitsinissaq anguniassavarput.
Qaanaap kommuneata ukioq mannamiit 2009-mut 4,5 million koruuninik sinneqartooruteqarnissaanik piumasaqaammut, kommunemik aqutsinikkut immikkoortortaqarfiit tamat suleqatigalugit anguniarneqassasoq Jens Danielsen oqarpoq.
Qaanaap kommunea Kommuneqarfinut Nakkutilliisoqarfimmit siorna nakkutigisaalerpoq, 7 million koruuninillu atukkerneqarnerup kingunerisaanik innuttaasunut soorlu eqqaavilerineq sannavinnik atuineq eqqumiittsuliorfinik atuineq akeqalerput, kommunemullu akileraarut 1 procentimik qaffanneqarluni. Qaanaami misissuiffigineqartussatut siunniunneqartoq Thule Fond, amerikamiunik isumaqatigiissuteqarnikut aningaasalersorneqartoq innutaasunit peqatigiiffinnillu qinnuteqarfigineqarpoq.
