Avatangiisit

Qaanaami immami miluumasut timmissallu pillugit nalunaarusiaq nutaaq

Pinngortitaleriffimmiit ilisimatusartartoq Carsten Egevang nalunaarusiamik nutaamik saqqummiusseqqammerpoq taaguuserneqarsimasumik ””Pikialasorsuarmi timmissanik misissuineq aammalu piniarneq pillugu sumiiffimmi ilisimasat, Qaanaaq juni 2013”.
Allattoq Karsten Sommer
aggustip 21-at 2015 05:21

Nalunaarusiami Pikialasorsuarmi, sumiiffia taavani Baffin Bugtip avannaarsuaniippoq, eqqornerusumik oqaatigalugu Qaanaap Canadamilu Ellesmere Islandip akornanni imartami ukioq kaajallallugu sikuinneq ajortumi, taamaalillunilu ammalatarsuusumi timmiaqassuseq allaaserineqarluni.

Qaanaap pigisaani piniartut aarrit qilalukkallu qernertat pillugit killiffimmik isiginninnerat nalunaarusiami tamatuma saniatigut atuarneqarsinnaavoq, taavanilu piniagaanerannik isiginninnerminnik saqqummiussaat.

 

Avinngarusimaqisunit paasissutissat nutaat
Piniartunik oqaloqatiginninnertigut uumasoqatigiit pineqartut marluk pillugit inatsiseqarnerup, aqutsinerup pissutsillu piviusut piniartunit misigisimaneqartut ataqatigiinnginnerat nalunaarusiakkut allaaserineqarput.

Paasissutissat soqutiginartorpassuit nalunaarusiami atuarneqarsinnaapput, misissuinertigummi sumiiffiit avinngarusimaqisut tikikkuminaatsullu anguneqarmata. Tamatuma saniatigut nalunaarusiaq asserpaalussuarnik kusanarluinnartunik alutornasaagaavoq.

Nalunaarusiaq Pinngortitaleriffiup nittartagaani atuarneqarsinnaavoq.

 

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk