Qaanaami suliniutissat arlalissuit aallartissapput
Naalakkersuisut Qaanaamut tikeraarnertik naggaserlugu Qaanaami kommunalbestyrelse ippassaq ataatsimeeqatigeeqqippaat, tassanilu Qaanaami siunissami iliuusissat suliniutissallu isumaqatigiissutigineqarput. Qaanaami inunnik isumaginninnikkut ilaqutariinnikkullu pissutsit aaqqivigineqartariaqartut assigiinngitsut aallaavigalugit annertuumik suliniarneq aallartippoq. Ilaqutariinnermut Naalakkersuisoq Aleqa Hammond ataatsimiinnerat qanoq pilersitsiviunersoq:
-Naalakkersuisut kommunalbestyrelsilu suliniutissat assigiinngitsut pillugit oqaloqatigiippugut, imigassaq kisimi eqqartorneqarnani, kisianni inunnik isumaginninnermut tunngasut, inuussutissarsiornermut ilinniartitaanermut inuiaqatigiinnilu pisariaqartitat allat naalakkersuisunut apuunneqarput.
Tamakku sanioatigut kommunalbestyrelsip kissaataa; illoqarfik nunaqarfiillu imminnut napatinnerusut eqqummaarinnerusullu anguniassagaanni pisariaqartitaasut aamma apuunneqarput.
Kommunep suliniutai suliniutigerusutaalu naalakkersuisunit apeqqarissaarfigineqarput.
- Soorunami tamarmik aningaasanik naleqarmata pingaarnersiuilluta eqqartuivugut.
Ilaqutariinnermut Naalakkersuisup akisussaaffeqarfiata suliassai ilaqutariinnermut tunngapput.
- Naalakkersuisoqarfimmiit ukioq mannamut suliniutissat pingaaruteqartut aningaasatigut immikkoortitsissuteqarfigisimavagut. Siunnersuutillu makkuninnga imaqarput:
- Qaanaami ilaqutariinnut aasaq manna pikkorissaalluni ilaqutariinnut højskolertitsinissaq. Tassanilu ilaqutariissutsimut meeraqarnermut pisinnaatitaaffiit, meeqqat pisinnaatitaaffii, angajoqqaat pisussaaffii assigiinngitsut pillugit eqqartuiffeqarlunilu pikkorissaatitsisoqassaaq.
Qaanaap kommuneani inunnik isumaginninnermut sullissisut aamma pikkorissartinneqassapput, sapinngisaq naapertorlugu sulisut nukissatigut amigaatitigullu pisariaqartitaat matussuserneqassallutik.
Tarnip pissusaanik immikkut ilinniarsimasumik piaartumik tikisitsiniartoqarpoq.
- Tkisitsisoqarnissaanik minnerpaamillu ukiuni pingasuni atorfiup inuttaqartinneqarnissaa eqqartorparput.
Augustip qaammataani sapaatip akunnerisa aappaanni pinaveersaartitsinikkut aamma paasititsiniaasoqassaaq.
- Meeqqanik atornerluisarnerup sumiginnaasarnerullu akiorniarneranut paasisitsiniaasussanik aamma tikittoqassaaq.
Aleqa Hammondip Qaanaamiinnini iluatsillugu ilaqutariit assigiinngitsut, angajoqqaaqatigiit, Red Barnett-imi meeqqat ornittagassaannik suliniuteqartut, utoqqaat innarluutillillu peqatigiiffiat aamma ataatsimeeqatigai.
- Innuttaasullu ataatsimiisinneqarneranni naalakkersuisuniit siunnersuutigisavut naapertuupput.
Ilaqutariinnermut Naalakkersuisoq Aleqa Hammond oqarpoq Qaanaami ilaqutariiinnermut suliniutaasussat aningaasartassalereerlugit siunnersuutaasut. Suliniutissat upernariaanut sikueriartornerani aallartisarneqassapput. Qaanaaq kommite, Qaanaami innutaasunit qinikkanit atorfilittanillu inuttaqartussaq, suleqatigalugu suliassat pingaarnersiorlugit tulleriaarneqassapput, taavalu, ukiuni aggersuini suliniutissat pillugit pilersaarusiornissaq Qaanaaq kommite aamma suleqatigilluinnarlugu ingerlanneqassasut Aleqa Hammond erseqqissaavoq.
