Qaanaami qinersineq naammassivoq

Imigassamut pointit atoqqilissappat? Imaluunniit immiaaqqat viinnillu kisimik tunisaalissappat? Imaluunniit imigassamik tuniniaaneq killilersugaanngitsoq atuutileqqissava? Apeqqutit taakku Qaanaarmiut ullumi taasissutigaat, qinersisinnaasullu 452-sut 63 %-ii, tassa 285-it taasiartorsimapput. Borgmesteri Jens Danielsen taasisitsinermik siunertaa pillugu ima oqarpoq:

-Tassa Qaanaarmiut qanoq isumaqarnersut takussutissiorlugu isumasiuivugut. Kommunalbestyrelsemi kisitta isumarput saqqummiunniannginnatsigu Qaanaarmiut isumaat paasiniarlugu taamatut taasititsivugut. Naak tamakkiisuunngikkaluamik, ilai suli suligamik taasiartungikkaluartut.

Taasititsinerminnut ammaasoqaqqinnissaa siunertaanersoq apeqqutigaarput akivorlu:

- Tassa takussutissatut Naalakkersuisut tuniumagivut. Naalakkersuisut namminneq matusisuugamik ammaanissamut soorunami aalajangiisussaapput.

Aperaarput taasinermi imigassap matoqqaannartinneqarnissaanik apeqqummik sooq ilanngussisoqarsimannginnersoq, akivoq:

- Matoqqaannarnissaanut naalakkersuisut oqariartuuteqanngillat, oqarput sivikinnerpaaq eqqarsaatigalugu ammaannartinneqassasoq. Matoqqaannarnissaa pillugu namminneerlutik taasisitsiumagunik pisortatigoortumik nunarput tamakkerlugu taasisitsisinnaapput, taama pilersaaruteqarunik. Uagulli qanoq isumaqarnerput siulliulluta takutipparput. Taasinerput taamatut paasissutissaannaavoq.

Jens Danielsenip erseqqissaatigaa namminneq ammaanissamut aalajangiisinnaaanatik, aalajangiinissarlu naalakkersuisuniittoq.

Qaanaami immiaaqqat viinnillu kisimik tunisaanissaannut isumaqataasut 44-pput.

Taava pointit atorneqaqqilernissaannut isumaqataasut 15-iullutik, taavalu qangatut imigassamik tuniniaasoqaqqilernissaanut isumaqataasut 222-iullutik.

Taasivissat taaasiffigineqarsimanatik tunniunneqarsimasut sisamaapput.