Qaanaami qaqortanik qilalugarniarneq unitsikkallaraat
Pisanik arlaleriarluni nalunaarsuisoqartannginnera tamatumalu pisassiissutinik sippuisoqarsinnaaneranik kinguneqarsinnaaneranik peqquteqarpoq.
Naalakkersuisoqarfiup kommuni piumaffigaa qaqortanik piniarsinnaanermut akuersissutit tamaasa kommunimut utertinneqassasut misissuinerullu naammassineqareernissaata pisanillu nalunaarsuinerit tamaasa tiguneqareernissaasa tungaanut atorunnaarsinneqarallassallutik.
Qilalugarniarnermut maleruaqqusat sukannersuupput
Aalisarnermut, Piniarnermut Nunalerinermullu Naalakkersuisoqarfiup erseqqissaatigaa qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat naapertorlugu pisat, saniatigut pisat pisassallu sapinngisamik piaarnerpaamik pisanik immikkut nalunaartussaatitaanermi immersugassaq atorlugu nalunaarutigineqartartussaammata.
Aammattaaq erseqqissaatigineqarpoq pisassiissutigineqartut kommunimit qularnaatsumik akisussaaffigineqartussaammata, pisassiissutigineqartut aamma sipporneqannginnissaat akisussaaffigineqarmat, tamakkerneqarpatalu piniarneq piaartumik unitsinneqassammat.
Naalakkersuisoqarfimmit aamma piniartunut erseqqissaatigineqarpoq pisanik amigartumik nalunaarsuisarnerup kingunerisinnaammagu qilalukkanik qaqortanik qernertanillu siunissami pisassiisarnernut sunniuteqarsinnaammat.