Qaanaami piniartoq: Nakorsaq atortanngilarput
Nunatsinni nannuttat aaffattallu nakorsamit misissorneqartussaapput. Peqqussulli tamanna Qaanaami piniartunit malinneqanngitsoq, Qaanaami nakorsaqarfiup Qaanaamilu piniartup oqaatigaat. Qaanaami piniartoq Lars Jerimiassen:
- Nakorsat taarseraappallaaqimmata tamanna atunngilarput. Piniartutut ima ajoqersuunneqarpugut; soorlu nannuttarput aaffattarpulluunniit saluppat nerisassattut naatsorsuunneqassanngilaq, taamaallaallu qimmit neqissaatut naatsorsuunneqassalluni. Nakorsalersunngikkaluarluta nammineq naliliisarpugut. Pinialeqqaarnitta nalaani nannup neqaa ulloq unnuarlu qerisimasaraangat quartortaraluarpugut massakkulli annilaanganarsinikuummata quartussaarnikuuvugut.
Biologinngorlaap Lone Nukaaraq Møllerip soraarummeerutigalugu allaaseraa Qaanaami qimmit 67 procentii nunatsinni qimmeqarfiusunut allanut sanilliullutik trikineqarnerusut.
Uumasut nakorsaat Inuussutissarsiornermi pisortaqarfimmeersoq Lasse Holm oqarpoq trikini ajornartorsiutaavallaanngikkaluartoq inatsit pineqartoq nutarterneqartariaqartoq. Neqi qeritiinnarlugu trikineerutsinneqarsinnaannginnerarpaa aatsaalli uulluarlugu trikinerutsinneqarsinnaanerarlugu.
