Qaanaami nioqqutissat akisoqaat

Qaanaami Pilersuisoq, isorliunerusumiittutut allatulli iserlugu amigaateqangaatsiarpoq pisiassallu ilaat Kitaani illoqarfinnut allanut naleqqiullutik aamma akisunerungaatsiarlutik. Kalaaliminissaaleqinngeqaat qallunaamernilli killeqaqalutik.

Pisiniarfiup ittua Qulutana Quist oqarpoq Qaanaaq ukiumut marloriaannarluni umiarsuarnit pajuttunit tikinneqartartoq:

- Umiarsuaq siulleq juulip ulluisa 27-ata missaani tikittarpoq, kingullerlu aggustimi tikittarluni. Taamammat pisiniarfimmi massakkut taama isikkoqarpoq, nioqqutissaqarpianngilaq, pingaartumik nerisassanik. Pisiassanillu ullussaminnik qaangiisimasunik maanna eqqaaleruttorpugut.

Qaanaamili timmisartunut suluusalinnut mittarfeqalernikuuvoq, taamaammat nioqqutissanik nillataartitsivimmiissinnaasunik pisiniarnissaminnut innuttaasut periarfissaqarnerulernikuupput, Qulutana Quist oqarpoq.

Tamakkuli akikitsuinnaanngillat, assartuinermi akisummat.

- Nioqqutissanik nillataartitsivimmiissinnaasunik Danmarkimiit tikisitsisalernikuuvugut, angallannerulli ajornartorsiortitsisinnaanera pissutigalugu, nutaavinnik tikisitsineq ajornakusoorpoq, aamma silap qanoq inera apeqqutaasaqimmat, Qulutana Quist oqarpoq.

Timmisartukkut tikisitat umiarsuarnit tikisitanit aamma akisunerupput.

- Sunut tamanut ungasissorujussuuvugut, taamaammat timmisartukkut tikisitat sinerissamut allamut naleqqiullugu akisunerungaatsiarput, kisianni Pisortaqarfiup ukiuunerani akinik aaqqiineratigut akikinnerulaaleraluarput, Qulutana Quist oqarpoq.

Nioqqutissat nillataartitat pisiniarfimmiittut misissorlugit K-Salat nasaaraagut. Qulutana Quist oqarpoq, nioqqutissat nillataartitat 414 kiilut tikissiigitik, maanna kinguartooqqasut.

Naatitanik USA-miit tikisitsisinnaanissamik Qaanaap Pituffik isumaqatigiissuteqarfigisimavaa. Eqqarsaataavoq naatitanik tonsip ataatsip missaanik USA-miit tikisitsinissaq, kisianni:

- Qulimiguulik Pituffimmiit sorpassuarnik allanik useqartarmat tamanna ajornakusooqaaq. Naatitanik Danmarkiminngaaniit tikisitsisassagutta banaani ataaseq 18 koruunit missaanik akeqartariaqassaaq, banaani ataaseq maannakku 6,95 koruuneqarpoq, iipililu 4,95 koruuneqarluni.

Qulutana Quist oqarpoq, Qaanaami najugaqarluni oqitsuinnaanngitsoq.

- Ajornartorsiornerulersimavugut, puisit amiinik tunisineq matuneqarnikuuvoq, qaleralinniarnissaq qinernianngikkaanni, oqarpoq.