Qaanaami nakorsaaneq: imigassaq ammartariaqarpoq
Qaanaami nakorsaaneq Hans Thorsøe Qaanaami imigassamik matusinermut akerlioqataavoq.
Hans Thorsøe isumaqarpoq Qaanaami imigassamik tuniniaaneq piaartumik ammaqqittariaqartoq, imigassamik pissarsisinnaannginneq pissutigalugu inuunermut navianaateqarsinnaasumik immiortoqartalermat.
- Maani imigassamik ajornartorsiuteqarneq allanut naleqqiukkaanni allaanerungaanngilaq, innuttaasut tamrmik imigassamik ajornartorsiuteqartuunngillat, ilaqarpulli allanisulli imigassamik ajornartorsiuteqartunik. Taamaattoqarnera pissutigiinnarlugu imigassamik matusineq eqqortuliornerunngilaq, illoqarfimmi innuttaasut tamakkerlugit pillarneqartariaqanngitsut isumaqarpunga, Hans Thorsøe oqarpoq.
Taanna aamma oqarpoq imigassamik matusineq pissutigalugu, inuunermik navianartorsiortitsinermik kinguneqarsinnaasumik immiorniartoqartalersimasoq, immiornissamullu atortussat tamarmik pisiniarfimmi pisiassaasut. Immiornermi immiap akuata aalakoornartup qanoq sakkortutiginera ilisimaneqartanngimmat, immiorneq napparsimalissutaasinnaasartoq, Hans Thorsøe tikkuaavoq.
¬- Maani imigassamik pinngitsuuisinnaajunnaarsimasoqarnersoq naluarput, tassami imigassamik pinngitsuuisinnaajunnaarsimasoqassaguni taakku imigassap matuneqarnerata kingorna nakorsiarsimassagaluarmata, taamaattoqarsimanngilarli, ataasiakkaalli nakorsiaanneqartariaqarsimapput, immiartorpallaarsimanertik pissutigalugu, immiartornermi navianaateqarsinnaammat. Taamaattumik isumaqarpunga imigassaq ammaqqinneqartariaqartoq, imigassallu inuunermut navianaataanngitsumik qanoq atorneqartariaqarnera pillugu paasisitsiniaasoqarluni, Qaanaami nakorsaaneq Hans Thorsøe oqarpoq.
Qaanaami imigassap qanoq pineqarnissaa pillugu innuttaasut ippassaq taasitinneqarmata taasisinnaasut 452-iusut 63 procentii, tassa 285-it, taasiartorsimapput, taakkualu 77,9 procentii, tassa 222-t, isumaqarput, imigassamik tuniniaaneq ammaqqinneqartariaqartoq. Immiaaqqat viinnillu kisimik tunisaanissaannut isumaqataasut 44-pput, taavalu pointit atorneqaqqilernissaannut isumaqataasut 15-iullutik.
