Qaanaami nakorsaaneq imigassamik matusisimanermut akerlioqataavoq.

- Kalaallit Nunaanni tamarmi imigassamik ajornartorsiut takussaavoq, nakorsaalluni tamanna malunnartarpoq, ajornartorsiut allanisulli ippoq,

Hans Thorsøe allappoq.

Qaanaami utoqqaanerusut imigassamik atornerluinerusuusut, taakkualu katsorsarniarnerat ajornakusoorsinnaasoq, Hans Thorsøe allappoq, nangillunilu:

- Ataaserli ilumoorpoq, tassa imigassamik matusineq inuunermut pitsaanerusumut aallartitsinavianngimmat, taamaattorli angerlarsimaffimmi immiortarnermut nuunneqaannarsinnaalluni, tamannalu aqukkuminaassinnaavoq.

Taamaattumik Hans Thorsøe isumaqarpoq Qaanaami illoqarfimmiut ataatsimut matusinikkut pineqaatissinneqarsimanerat peqqinnanngitsuusoq.

Utoqqaanerusut pissutsinut nutaanut sukkasuumik pulaniartariaqarsimanerat ilaatigut imigassamik atornerluinermik kinguneqarsimasoq, qallunaallu aamma taama misigititaasimagaluarunik asiusimassagaluartut, Hans Thorsøe erseqqissaavoq.

- Inuusunnerusut imigassap qanoq atornissaanut ilinniartinneqartariaqarput, soorlu imigassartorfiungitsumik ataatsimooqatigiittarnertigut, Hans Thorsøe allappoq.